Táningurinn í stuði í dýr­mætum sigri Liver­pool

Liverpool styrkti stöðu sína til muna í dag í baráttunni um sæti í Meistaradeild Evrópu í fótbolta á næstu leiktíð.

Hinn 17 ára gamli Rio Ngumoha átti ríkan þátt í því en hann skoraði fyrra markið í 2-0 sigri gegn Fulham á Anfield í dag.

Ngumoha nýtti vel tækifæri sitt í byrjunarliðinu og skoraði með afar laglegum hætti, í fjærhornið eftir að hafa komið inn í vítateiginn vinstra megin, á 36. mínútu.

Aðeins örfáum mínútum síðar kom Ngumoha aftur með boltann á svipuðum slóðum en sendi þá á Cody Gakpo sem kom boltanum áfram á úthvíldan Mohamed Salah sem skoraði með frábæru skoti.

Gestirnir frá Fulham gerðu sig aldrei sérstaklega líklega til að krækja í stig eftir þetta og LIverpool er þar með komið með 52 stig í 5. sæti ensku úrvalsdeildarinnar, aðeins tveimur stigum á eftir Aston Villa og þremur á eftir Manchester United sem eiga leik til góða.

Liverpool er auk þess fjórum stigum á eftir Chelsea sem mætir Manchester City á morgun. Þá gerðu Brentford og Everton jafntefli í dag og eru nú fimm stigum á eftir Liverpool. Ljóst er að fimm efstu lið deildarinnar komast í Meistaradeildina á næstu leiktíð.