Tæp­lega þúsund drónar á einum sólar­hring

Að minnsta kosti sex eru látnir og 46 eru særðir eftir árásirnar, samkvæmt AP-fréttaveitunni.

Tugum dróna var einnig beint að Kænugarði, auk þess sem Rússar notuðust við 23 stýriflaugar og sjö skotflaugar til árása víðsvegar um landið. Í Lviv kviknaði eldur í sögufrægri kirkju sem er á minjalista UNESCO. Í borginni Ivano-Frankivsk voru árásir gerðar á sjúkrahús og þó nokkur fjölbýlishús.

Árásir sem þessar eru svo gott sem daglegt brauð í Úkraínu en þær eru sjaldan svo umfangsmiklar. BBC hefur eftir talsmanni flughers Úkraínu að saman séu árásirnar í gær og í dag þær umfangsmestu sem Rússar hafa gert á einum sólarhring.

Úkraínumenn hafa á undanförnum árum þróað lagaskipt varnarkerfi gegn þessum drónum og skjóta yfirleitt bróðurpart þeirra niður eða granda þeim með öðrum hætti. Notast er við margskonar skynjara til að kortleggja ferðir drónanna yfir Úkraínu og til að skjóta þá niður eða granda með rafrænum truflunum.

Meðal annars notast Úkraínumenn við þyrlur, ódýr eldri flugskeyti sem búið er að breyta svo hægt sé að stýra þeim með leisergeislum, teymi hermanna á pallbílum með loftvarnarbyssur, önnur sérstök loftvarnarkerfi og jafnvel gamlar tveggja sæta flugvélar þar sem farþeginn er vopnaður haglabyssu og/eða riffli til að skjóta drónana niður.

Sjá einnig: Vilja tækni og peninga fyrir að­stoð gegn írönskum drónum

Ein besta leiðin sem Úkraínumenn hafa þróað til að granda sjálfsprengidrónum eru hraðskreiðir fyrstu persónu drónar, sem stýrt er með sýndarveruleikagleraugum, en þeir eru tiltölulega ódýrir og auðveldir í framleiðslu.

Vorsóknin hafin?

Úkraínumenn hafa verið að búa sig undir vorsókn Rússa. Reynslan hefur sýnt það á undanförnum árum að þegar veðrið skánar hafa Rússar gert tilraunir til að brjóta sér leið í gegnum varnir Úkraínumanna.

Oleksander Sirskíj, yfirmaður herafla Úkraínu, segir að á undanförnum dögum hafi Rússar gert þó ítrekaðar tilraunir til að komast gegnum varnir Úkraínumanna á mikilvægum stöðum á víglínunni. Þeir reyni einnig að senda nýjar sveitir og liðsauka á víglínuna til að halda þessum sóknum áfram.

Þetta þykir til marks um að vorsóknin sé mögulega þegar hafin.

Hermaður sem ræddi við blaðamann AP sló á svipaða strengi og Sirskíj. Hann sagði árásum Rússa hafa fjölgað en þær hefðu ekki skilað tilætluðum árangri hingað til. Þessi hermaður var á víglínunni nærri Lyman í Dónetskhéraði.