Trump sak­felldur fyrir skjala­fals í þagnar­greiðslu­máli

Niðurstaða kviðdómsins var lesin upp nú fyrir stundu. Trump er fyrsti fyrrverandi forseti Bandaríkjanna sem er sakfelldur í sakamáli og fyrsti sakamaðurinn sem er forsetaframbjóðandi annars stóru flokkanna tveggja. 

Lögmaður Trump krafðist þess að dómarinn hafnaði niðurstöðu kviðdómsins en þeirri kröfu var snarlega vísað frá. Dómari ákveður refsingu Trump síðar. Trump gengur laus án tryggingar í millitíðinni. Hann gæti átt yfir höfði sér sekt, skilorð eða jafnvel fangelsisdóm.

Að niðurstöðunni fenginni hélt Trump því enn og aftur fram að hann hefði verið misrétti beittur og að málið væri runnið undan rifjum ríkisstjórnar Joes Biden þrátt fyrir að það væri ríkis- en ekki alríkismál. Raunveruleg dómsuppkvaðning yrði í forsetakosningunum 5. nóvember.

„Þetta var skammarlegt, þessum réttarhöldum var hagrætt hjá dómara með hagsmunaárekstra sem er spilltur,“ fullyrti hann.

„Ég er mjög saklaus maður,“ sagði Trump enn fremur.

Sakfelldur fyrir að fela ólögleg kosningaútgjöld

Trump var ákærður fyrir að falsa fjármálaskjöl fyrirtækis síns til þess að fela raunverulegt eðli greiðslna til Stormy Daniels, fyrrverandi klámstjörnu sem hélt því fram að hún hefði átt í kynferðislegu sambandi við Trump árið 2006.

Saksóknari í New York-ríki hélt því fram að greiðslurnar til þess að kaupa þögn Daniels hefðu með réttu átt að vera skráðar sem kostnaður við forsetaframboð Trump. Hann hefði þannig framið glæp með því að falsa gögn til þess að hylma yfir ólögleg kosningaútgjöld.

Washington Post segir að Trump hafi setið með krosslagðar hendur og fylgst með kviðdómendunum þegar hver og einn þeirra gerði grein fyrir afstöðu sinni. Hann hafi svo staðið og hagrætt bindi sínu þegar kviðdómendurnir gengu út úr salnum. Þegar fyrrverandi forsetinn gekk út úr salnum segir blaðið að hann hafi verið með geiflusvip og rjóður í kinnum.

Verjendur Trump hafa mánuð til þess að tilkynna hvort þeir ætli að áfrýja dómnum og hálft ár til þess að leggja áfrýjunina fram.

Aðeins ein leið fær til að halda Trump frá Hvíta húsinu

Framboð Trump sendi stuðningsmönnum hans tölvupóst til þess að óska eftir fjárframlögum um leið og sakfelling hans lá fyrir. Þar er Trump lýst sem pólitískum fanga þrátt fyrir að refsing hans liggi ekki fyrir og ekki sé ljóst að hann hljóti fangelsisdóm fyrir.

Talsmaður Biden sagði að aðeins ein leið væri fær til þess að halda Trump fjarri Hvíta húsinu og að það væri í kjörklefanum

„Hvort sem hann er dæmdur sakamaður eða ekki þá verður Trump frambjóðandi repúblikana til forseta.“

Sakfellingin í New York hefur ekki áhrif á kjörgengi Trump, jafnvel þótt hann væri síðar dæmdur til fangelsisvistar.

Þrjú önnur mál vofa yfir Trump

Þagnargreiðslumálið í New York er aðeins eitt fjögurra sakamála sem Trump var ákærður í. Tvö þeirra eru alríkismál sem Jack Smith, sérstakur rannsakandi dómsmálaráðuneytisins, höfðaði. Annað þeirra snýst um leynileg skjöl sem Trump hafði með sér úr Hvíta húsinu þegar hann lét af embætti en hitt um tilraunir hans til þess að snúa úrslitum forsetakosninganna árið 2020 við.

Þá er Trump á meðal fjölda sakborninga í máli sem umdæmissaksóknari í Georgíu höfðaði vegna tilrauna til þess að hnekkja úrslitum forsetakosninganna þar, meðal annars með því að þrýsta á embættismenn í ríkinu.

Bandarískir forseta hafa náðunarvald í alríkismálum en það nær ekki til dóma sem ríkisdómstólar einstakra ríkja fella.