Wild­er verður níundi þjálfari Wat­ford síðan haustið 2019

Bilić tók við stjórnartaumunum hjá Watford í september þegar Pozzo-fjölskyldan, eigendur liðsins, ákváðu að reka Rob Edwards. Sem stendur situr liðið í 9. sæti ensku B-deildarinnar, fjórum stigum frá sæti í umspilinu sem getur gefið sæti í ensku úrvalsdeildinni.

Þrátt fyrir að mikil meiðsli herji á leikmannahóp Watford og enn séu 33 stig í pottinum þá ákvað Pozzo-fjölskyldan að nú væri nóg komið og lét Bilić taka poka sinn.

Chris Wilder, sem kom Sheffield United alla leið upp í ensku úrvalsdeildina eftir að hafa tekið við liðinu í C-deildinni, mun taka við af Bilić. Hann verður 9. þjálfari Watford síðan í september 2019 og sá 18. síðan Pozzo-fjölskyldan keypti félagið 2012.

Hversu lengi Wilder endist í stjórastól Watford mun koma í ljós en það er eflaust ekki hár stuðull að hann verði enn þjálfari liðsins þegar tímablið 2023-24 hefst.