Erlent

Lyman er í höndum Úkraínumanna

Samúel Karl Ólason skrifar
Úkraínskir hermenn á ferðinni í austurhluta landsins.
Úkraínskir hermenn á ferðinni í austurhluta landsins. Getty/Scott Peterson

Úkraínumenn hafa rekið Rússa á brott frá bænum Lyman í norðanverðu Donetsk-héraði. Talsmaður úkraínska hersins sagði í morgun að allt að 5.500 rússneskir hermenn hefðu verið umkringdir þar en meirihluti þeirra virðist hafa flúið áður en borgin var umkringd.

Rússar hafa notað Lyman sem birgðastöð og fyrir árásir þeirra í Donetsk og yrði tap bæjarins mikið högg fyrir þá. Áðurnefndur talsmaður sagði að með því að frelsa Lyman opnaðist leið fyrir Úkraínumenn inn í Luhansk-hérað, sem Rússar stjórna að mestu.

Talsmaður úkraínska hersins sagði blaðamönnum í morgun að allt að fimm þúsund og fimm hundruð rússneskir hermenn væru umkringdir en talan gæti verið lægri vegna mikils mannfalls og tilrauna Rússa til að brjóta sér leið út úr umsátrinu.

Talsmaðurinn sagði einnig að einhverjir rússneskir hermenn væru að gefast upp og margir hefðu fallið eða særst.

Skömmu fyrir hádegið byrjuðu þó að berast fregnir af því að flestir rússneskir hermenn hefðu yfirgefið Lyman og barst myndefni af úkraínskum hermönnum í borginni. Einhverjir hermenn eru sagðir vera þar áfram en það er óstaðfest eins og er.

Þá er einnig enn óljóst hvort einhverjir rússneskir hermenn hafi verið handsamaðir, eins og áðurnefndur talsmaður hélt fram í morgun.

Flestir sagðir hafa hörfað

Það að Rússar hafi mögulega hörfða frá Lyman rímar við fregnir gærdagsins og það að Úkraínumenn hafi haldið einni undankomuleið opinni fyrir Rússa og undirbúið árásir á rússneskar hersveitir á ferðinni.

Þannig hefðu Úkraínumenn geta breytt skipulögðu undanhaldi í almennan flótta og valdið miklu mannfalli meðal Rússa.

Sjá einnig: Umkringdir rússneskir hermenn sagðir hörfa frá Lyman

Myndbandið sem sjá má hér að neðan er sagt hafa verið tekið í gær og sýna rússneska hermenn yfirgefa Lyman. Það vekur athygli að þar má sjá fjölmarga hefðbundna bíla í röðinni, sem rússneskir hermenn virðast hafa tekið. Engar stórskotaliðsárásir sjást þó sem gæti þýtt að Úkaínumönnum hafi ekki tekist að gera árásir á Rússa þegar þeir hörfuðu.

Þá eru Rússar sagðir hafa sprengt upp brú á eftir sér.

Þá eru einnig að berast óstaðfestar fregnir af því að Úkraínumenn hafi haldlagt mikið af hergögnum sem rússnekir hermenn eru sagðir hafa skilið eftir á undanhaldinu.

Hér að neðan má sjá myndband af T-90A skriðdreka sem Rússar eru sagðir hafa yfirgefið nærri Lyman. Þessir skriðdrekar eru meðal þeirra háþróuðustu sem framleiddir eru í Rússlandi.

Innlimaði Lyman í gær

Bæði Donetsk og Luhansk eru meðal þeirra héraða sem Vladimír Pútín, forseti Rússlands, lýsti yfir í gær að hefðu verið innlimuð í rússneska sambandsríkið.

Rússar lýstu í gær yfir ólöglegri innlimun fjögurra héraða Úkraínu. Úkraínumenn segja það gera út af við möguleikann á friðarviðræðum og heita því að frelsa öll héruð landsins og þar á meðal Krímskaga, sem Rússar innlimuðu árið 2014.

Pútín var vígreifur í garð Vesturlanda í ræðu sem hann hélt í gær og gaf meðal annars til kynna að notkun kjarnorkuvopna kæmi til greina.

Joe Biden, forseti Bandaríkjanna, sem eru helstu bakhjarlar Úkraínu, sagði í gær að innlimunin og ógnanir Pútins myndu ekki breyta neinu. Bandaríkin og heimurinn allur myndi ekki viðurkenna innlimunina.


Tengdar fréttir

„Þetta sýnir ekki styrk. Þetta sýnir veikleika“

Jens Stoltenberg, framkvæmdastjóri Atlantshafsbandalagsins (NATO), segir ólöglega innlimun Rússlands á fjórum héruðum Úkraínu vera mikla stigmögnun í tengslum við innrás Rússa hingað til. Ákvörðun Vladimírs Pútíns, forseta Rússlands, hefði þó ekki áhrif á eðli átakanna eða stuðning NATO við Úkraínu.

Óska eftir skjótri inngöngu í NATO

Vólódímír Selenskí, forseti Úkraínu, tilkynnti nú fyrir skömmu að ríkisstjórn hans hafi formlega sótt um skjóta inngöngu í Atlantshafsbandalagið (NATO). Það er í kjölfar þess að Vladimír Pútín, forseti Rússlands, skrifaði undir ólöglega innlimun fjögurra héraða Úkraínu.

Bölsótaðist út í Vesturlönd

Vladimír Pútín, forseti Rússlands, segir að þau héruð Úkraínu sem hann innlimaði einhliða og ólöglega í rússneska sambandsríkið í dag tilheyri Rússlandi. Þau hafi tilheyrt rússneska keisaraveldinu og Sovétríkin hafi rekið Þjóðverja þaðan í seinni heimsstyrjöldinni.

Putin með sjónarspil í tilefni ólöglegrar innlimunar

Í hádeginu fer fram athöfn í Kreml þar sem Vladimir Putin forseti Rússlands undirritar formlega yfirlýsingu um innlimun fjögurra héraða í Úkraínu í rússneska sambandslýðveldið. Bandaríkjaforseti segir að Bandaríkin muni aldrei viðurkenna þennan gjörning.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.