Innlent

Sáttmálinn fellur í misgóðan jarðveg

Berghildur Erla Bernharðsdóttir skrifar
Auður Önnu Magnúsdóttir framkvæmdastjóri Landverndar, Guðlaug Rakel Guðjónsdóttir forstjóri Landspítala og Þuríður Harpa Sigurðardóttir formaður Öryrkjabandalagsins.
Auður Önnu Magnúsdóttir framkvæmdastjóri Landverndar, Guðlaug Rakel Guðjónsdóttir forstjóri Landspítala og Þuríður Harpa Sigurðardóttir formaður Öryrkjabandalagsins. Vísir/Sigurjón

Það er mjög jákvætt að styrkja eigi þjóðarsjúkrahúsið segir forstjóri Landspítalans um nýjan stjórnarsáttmála. Framkvæmdastjóri Landverndar segir hins vegar náttúru Íslands fjarverandi í sáttmálanum. Formaður öryrkja ætlar að reyna að vera bjartsýnn.

Íslenskt samfélag er nú í kjörstöðu til þess að horfa til framtíðar og sækja fram í þágu vaxandi velsældar segir í upphafsorðum nýs stjórnarsáttmála ríkisstjórnarinnar sem kynntur var í gær.

Sáttmálin snertir á um þrjátíu málaflokkum. 

Ánægð með áherslur í heilbrigðismálum

Í kaflanum um heilbrigðismál kemur m.a fram að stefnt er að því að þjónustutengd fjármögnun verði innleidd í auknum mæli í heilbrigðiskerfið, settir upp miðlægir biðlistar og tryggt að þjónusta sé veitt innan tiltekins ásættanlegs biðtíma.  Staða og hlutverk Landspítalans sem mikilvægustu heilbrigðisstofnunar landsins verður styrkt. Áfram verður dregið úr greiðsluþátttöku sjúklinga, með áherslu á viðkvæma hópa. Þá verður geðheilbrigðisþjónusta áfram efld fyrir alla hópa samfélagsins,

Guðlaug Rakel Guðjónsdóttir forstjóri Landspítala er ánægð með heilbrigðiskaflann í sáttmála ríkisstjórnarinnar. 

Guðlaug Rakel Guðjónsdóttir forstjóri Landspítalans er ánægð með nýjan sáttmála ríkisstjórnarinnar.Vísir/Sigurjón

„Það er mjög jákvætt að það eigi að efla og styrkja þjóðarsjúkrahúsið, bráðamóttökuna og gjörgæsluna eins og sérstaklega er getið um í sáttmálanum.  Og það eigi að horfa á menntun heilbrigðisstétta til framtíðar. Það er alveg ljóst að það þarf að skoða fjármögnun spítalans og þessi framleiðslutengda fjármögnun sem getið er um í nýjum samningi er hluti af því ,“ segir Guðlaug Rakel.  

Náttúran fjarverandi

Í stjórnarsáttmálanum er kaflinn um loftslagsmál um ein og hálf blaðsíða og þannig með lengri köflum í sáttmálanum. Þar kemur fram að stefnt er á að  Ísland verði lágkolefnishagkerfi og nái kolefnishlutleysi eigi síðar en 2040.  Sett verður sjálfstætt landsmarkmið um 55% samdrátt í losun á beinni ábyrgð Íslands fyrir 2030 miðað við 2005. Þá er stefnt að því að Ísland verði óháð jarðefnaeldsneyti fyrst þjóða.

Auður Önnu Magnúsdóttir framkvæmdastjóri LandverndaVísir/Sigurjón

Auður Önnu Magnúsdóttir framkvæmdastjóri Landverndar segist ánægð með markmið um samdrátt í losun gróðurhússloftegunda og markmiðið um jarðefnaeldsneytislaust Ísland 2040. Þar með sé það nánast upptalið.

 „Okkur finnst mjög skrítið miðað við samsetningu ríkistjórnarinnar að náttúran sé næstum því fjarverandi. Það á ekki að fara í neinar aðgerðir til að efla verndun hennar, nema síður sé. Þá höfum við miklar áhyggjur af því að umhverfisráðherra eigi líka að vera orkumálaráðherra því hagsmunir málaflokkanna stangast oft á,“ segir Auður. 

Aðspurð um hvaða aðgerðir hún myndi vilja sjá svarar hún:

„Eins og í síðasta ríkisstjórnarsáttmála þá myndum við vilja sjá markmið um hálendisþjóðgarð, sjá stofnun utan um náttúruvernd, efla náttúruminjaskrá og stækka fyrirliggjandi virkjanir í stað þess að ætla að virkja á nýjum svæðum,“ segir Auður. 

Vonar að ríkistjórnin standi sig betur nú en síðast

Í kafla ríkisstjórnarinnar  um öryrkja kemur m.a. eftirfarandi fram  einfalda á örorkulífeyriskerfið  og draga úr tekjutengingum. Þátttaka og endurkoma einstaklinga með skerta starfsgetu á vinnumarkað verður auðvelduð. Þá á að vinna markvisst að því að fjölga sveigjanlegum störfum og hlutastörfum.

Þuríður Harpa Sigurðardóttir formaður Öryrkjabandalags Íslands.Vísir/Sigurjón

Þuríður Harpa Sigurðardóttir formaður Öryrkjabandalags Íslands ætlar að reyna að vera bjartsýn fyrir hönd málaflokksins. 

„Það var margt fallegt skrifað inn í síðasta stjórnarsáttmála um öryrkja og fatlað fólk en þrátt fyrir það þá var þetta fólk skilið eftir. En ég er bjartsýn og vonandi tekst ríkisstjórninni ætlunarverk sitt á þessu kjörtímabili. Þá þarf að lögfesta samning Sameinuðu þjóðanna um réttindi fatlaðs fólks. Ég vona svo sannarlega að nýr félagsmálaráðherra fái tækifæri til að bæta og breyta,“ segir Þuríður. 


Tengdar fréttir

Það helsta sem snertir viðskiptalífið í nýja sáttmálanum

Stjórnvöld ætla að halda áfram að selja eignarhlut sinn í Íslandsbanka, auka frelsi fólks til að ráðstafa viðbótarlífeyrissparnaði og hvetja lífeyrissjóði til þátttöku í innviðafjárfestingum. Þetta er á meðal þess sem varðar viðskiptalífið hvað mest í nýjum stjórnarsáttmála Framsóknarflokksins, Sjálfstæðisflokksins og Vinstri Grænna.

Verk­falls­vopnið slævt

Um helgina tók til starfa ný ríkisstjórn, annað ráðuneyti Katrínar Jakobsdóttur, sem vonandi markar upphaf góðra tíma í landsmálum jafnt sem menntamálum.

Uggandi yfir nýju fyrir­komu­lagi og kalla eftir skýrum að­gerðum

Stjórn Landverndar fagnar markmiðum nýrrar ríkisstjórnar í loftslagsmálum en kallar eftir skýrari aðgerðum til að ná þeim. Áform um að ganga gegn áliti fagaðila varðandi rammaáætlun þrjú sé stríðsyfirlýsing. Þá óttast Landvernd að sama ráðuneytið haldi utan um orkumál og náttúruvernd.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.