For­dæma inn­brot í Reykjabú

Samtökin segja í tilkynningu atvikið alvarlegt. Um er að ræða annað innbrotið í landbúnaðarfyrirtæki á skömmum tíma en brotist var inn hjá Stjörnugrís í síðasta mánuði.

Ræktaðir eru kalkúnar og kjúklingar á Reykjabúi. Þar voru aðfaranótt mánudags unnin skemmdarverk á býlinu og skilin eftir stefnuyfirlýsing, eða svokölluð „manifestó“. Slík yfirlýsing var einnig skilin eftir í innbroti til Stjörnugríss. Jón Magnús Jónsson, bóndi á Reykjabúi, sagði í samtali við fréttastofu fyrr í dag að einn maður hefði verið að verki. Hann hafi borið út fugla sem síðar þurfti að aflífa.

„Hugur okkar er hjá eigendum Reykjabús og starfsfólki fyrirtækisins. Fyrir þá sem verða fyrir slíku er þetta ekki aðeins eignatjón heldur innrás inn á vinnustað þeirra og lífsviðurværi. Það er óásættanlegt að fólk sem starfar við matvælaframleiðslu þurfi að búa við slíkt óöryggi. Þegar tvö innbrot eiga sér stað á skömmum tíma og leiða bæði til tjóns, dauða eða aflífunar dýra og mikils álags á starfsfólk er full ástæða til að staldra við og spyrja hvert þessi þróun er að leiða okkur. Það þarf að senda skýr skilaboð um að innbrot, áreiti og ólögmætar aðgerðir eigi aldrei rétt á sér,“ segir Margrét Gísladóttir, framkvæmdastjóri Samtaka fyrirtækja í landbúnaði, í tilkynningu samtakanna.

Innviðir og atvinnustarfsemi

Samtökin benda á að búrekstur og matvælaframleiðsla séu ekki aðeins atvinnustarfsemi heldur einnig hluti af innviðum samfélagsins. Óviðkomandi aðgangur að framleiðslusvæðum geti haft áhrif á starfsöryggi, smitvarnir, dýraheilbrigði og matvælaöryggi.

„Það er sérstakt áhyggjuefni að aðgerðir sem sagðar eru framkvæmdar í nafni dýravelferðar skuli í reynd hafa leitt til þess að dýr hafi drepist eða þurft að aflífa. Þá hefur aðgerð sem átti að snúast um velferð dýranna í raun snúist upp í andstæðu sína,“ segir í tilkynningu samtakanna. Afleiðingarnar hafi þannig áhrif á dýrin, starfsfólk og fjölskyldur þeirra.

„Við eigum að geta átt opna og málefnalega umræðu um landbúnað, dýravelferð og matvælaframleiðslu. Slík umræða á fullan rétt á sér en það er grundvallaratriði að hún fari fram innan marka laga. Innbrot í atvinnuhúsnæði eru ekki eðlilegt tjáningarform heldur lögbrot,“ segir Margrét.

Kæra til lögreglu

„Matvælastofnun áréttar að innbrot inn til bænda og/eða fyrirtækja sem halda dýr, þar sem dýr eru rekin út, verða mögulega fyrir meiðslum eða skaða vegna smitefna sem berast í húsin, eru brot á lögum um velferð dýra nr. 55/2013,“ segir í tilkynningu frá Mast.

Slík reynsla sé ekki dýrum til hagsbóta heldur geti hún mögulega haft alvarlegar afleiðingar fyrir velferð dýranna. Þar má nefna streitu, ótta, þjáningu, meiðsli og dauða. 

„Í kjölfar slíkra innbrota hefur þurft að aflífa dýr. Á búum eru almennt miklar smitvarnir og innbrot með þessum hætti geta borið í húsin ný smitefni sem geta haft alvarlegar heilsufarslegar afleiðingar fyrir öll dýrin í húsinu.“

Forsvarsmenn Matvælastofnunar hyggjast fylgja málinu eftir og kæra brot á lögum um velferð dýra til lögreglu.

Fréttin var uppfærð með tilkynningu Matvælastofnunar.