Íslenski boltinn

Sjáðu mörkin hjá þjálfara­lausum Eyja­konum, úr endur­­komu Breiða­bliks, sigri Vals og öll hin mörkin í 9. um­­­ferð

Runólfur Trausti Þórhallsson skrifar
ÍBV vann góðan 2-1 sigur í Árbænum.
ÍBV vann góðan 2-1 sigur í Árbænum. Vísir/Bára Dröfn

Mikið fjör var í 9. umferð Pepsi Max deild kvenna. Liðin á útivelli unnu öll sína leiki í umferðinni. Íslandsmeistarar Breiðabliks unnu frábæran endurkomu sigur á Þrótti Reykjavík í Laugardalnum en hér að neðan má sjá öll mörkin úr umferðinni.

Breiðablik heimsótti Þrótt í fjörugasta leik umferðarinnar. Staðan var 0-1 í hálfleik þökk sé marki Tiffany Janea Mc Carthy. Þegar tíu mínútur voru liðnar af síðari hálfleik jafnaði Linda Líf Boama metin er hún fylgdi á eftir skoti Ísabellu Önnu Húbertsdóttur.

Katherine Amanda Cousins kom Þrótti yfir með marki úr vítaspyrnu á 76. mínútu en Íslandsmeistararnir sneru taflinu sér í hag undir lok leiks. Agla María Albertsdóttir jafnaði metin á 87. mínútu með stórkostlegu marki utan af velli. Vigdís Edda Friðriksdóttir tryggði gestunum öll þrjú stigin með marki þegar tvær mínútur voru komnar fram yfir venjulegan leiktíma.

Öll mörk umferðarinnar sem og viðtöl má sjá í spilaranum hér að neðan.

Klippa: Yfirferð yfir Pepsi Max kvenna

Valur hélt toppsætinu með 2-1 útisigri á Selfossi. Eftir markalausan fyrri hálfleik var það Mist Edwardsdóttir sem kom gestunum yfir með skalla eftir hornspyrnu Dóru Maríu Lárusdóttur. Skömmu síðar jafnaði Hólmfríður Magnúsdóttir metin með skoti af löngu færi en Elín Metta Jensen skoraði sigurmark leiksins á 77. mínútu og þar við sat.

„Dekka helvítis mennina sem skora mörkin,“ sagði pirraður Alfreð Elías Jóhannsson í viðtali eftir leik aðspurður hvað hann hefði viljað sjá sitt lið gera betur í leiknum.

Í Árbænum var þjálfaralaust lið ÍBV í heimsókn. Hin 17 ára gamla Þóra Björg Stefánsdóttir kom ÍBV yfir með glæsilegu marki úr aukaspyrnu undir lok fyrri hálfleiks. Staðan 0-1 í hálfleik.

Segja má að það hafi verið ákveðið þema í gær en Jakobína Hjörvarsdóttir, 17 ára leikmaður Þór/KA, skoraði einnig beint úr aukaspyrnu í gær.

Aftur að leiknum í Árbænum: Olga Sevcova nýtti sér mistök í öftustu línu Fylkis í upphafi síðari hálfleiks og kom ÍBV 2-0 yfir áður en Bryndís Arna Níelsdóttir minnkaði muninn á 78. mínútu með snyrtilegu skoti af stuttu færi. Staðan orðin 2-1 og reyndust það lokatölur í Lautinni.

María Dögg Jóhannesdóttir tryggði nýliðum Tindastóls sigur á Stjörnunni í Garðabæ er hún skoraði eina mark leiksins strax á sjöundu mínútu eftir baráttu í teig heimakvenna eftir hornspyrnu.

Gríðarlega mikilvægur sigur Tindastóls. Bryndís Rut Haraldsdóttir, fyrirliði liðsins, fór fyrir sínum konum í leiknum en vikan í aðdraganda leiksins var heldur betur viðburðarrík hjá henni.

Að lokum vann Þór/KA 2-1 útisigur á Keflavík. Jakobína kom gestunum frá Akureyri yfir um miðbik fyrri hálfleiks og þannig var staðan í hálfleik. Margrét Árnadóttir tvöfaldaði forystuna þegar rúm klukkustund var liðin af leiknum.

Amelía Rún Fjeldsted minnkaði muninn fyrir Keflavík undir lok venjulegs leiktíma og þar við sat, lokatölur 2-1. 


Pepsi Max deild kvenna er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.


Tengdar fréttir

Umfjöllun og viðtöl: Selfoss - Valur 1-2| Valur styrkti stöðu sína á toppnum

Það var mikið undir í toppslag kvöldsins. Bæði lið tóku fáar áhættur til að byrja með leiks og var fyrri hálfleikurinn hinn allra rólegasti.Mist Edvardsdóttir kom Val yfir snemma í síðari hálfleik sem kveikti miklu lífi í leikinn. Hólmfríður Magnúsdóttir jafnaði leikinn með laglegu marki en Elín Metta Jensen gerði síðan seinna mark Vals sem tryggði þeim 1-2 sigur. Umfjöllun og viðtöl væntanleg.

Þór/KA upp úr fallsæti eftir útisigur

Þór/KA náði sér í mikilvæg þrjú stig í Pepsi Max deild kvenna með 2-1 útisigri gegn Keflavík. Með sigrinum lyfta stelpurnar að norðan sér upp í sjöunda sæti.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.