Hópur fólks varð fyrir lest í Svíþjóð

Slysið varð klukkan 10:45 að staðartíma í morgun og viðbragðsaðilar voru kallaðir til stuttu síðar. Mikið viðbragð er á staðnum, björgunarsveitir, lögregla og sjúkrabílar eru á staðnum.

Að sögn Patriks Freij, yfirmanns björgunarsveitarinnar í Kristianstad, segir í samtali við sænska ríkisútvarpið að lestin hafi keyrt á nokkra sem voru á lestarteinunum. Lestin var kyrrsett og er enn á staðnum. Farþegar í lestinni þurftu að bíða um borð þar til um klukkan 13 að staðartíma, klukkan 11 að íslenskum tíma, þegar rýming hófst.

„Lestin keyrði á nokkra sem voru á lestarteinunum. Þetta er mjög alvarlegt slys,“ segir Freij.

„Við vitum ekki nákvæmlega hvað gerðist. Við höfum girt svæðið af,“ sagði Åsa Emauelsson, talsmaður lögreglu í samtali við sænska ríkisútvarpið.

Lokað hefur verið fyrir alla umferð um lestarteinana milli Hässleholm og Sösdala. Þá hafa orðið einhverjar tafir á lestarumferð milli Malmö og Stokkhólms. Skånetrafiken, lestarþjónusta Svíþjóðar, segir ekki liggja fyrir hvenær samgöngur hefjist með eðlilegum hætti að nýju.

„Við höfum sent út rútur sem munu keyra frá Hässleholm til Eslöv, Lundar og Kristianstad,“ segir Kajsa Jakobsson, talsmaður Skånetrafiken.