Fimm ár frá skjálftanum á Haíti

Íbúar Haítí komu saman víða um landið í dag til að minnast þess að fimm ár eru liðin frá því að jarðskjálfti, sjö að stærð, reið yfir landið. Upptök skjálftans voru aðeins 25 kílómetra fyrir utan höfuðborgina Port-au Prince en borgin, og svæðin í kring, lögðust nánast í rúst eftir skjálftann.

Skjálftinn átti sér stað skömmu fyrir klukkan fimm síðdegis þann 12. janúar 2015. Stjórnvöld á Haítí gáfu út að yfir 300.000 manns hafi látist í hamförunum en sú tala hefur verið dregin í efa og er talið að hún sé nokkuð ýkt. Engin formleg talning fór fram á því hve margir týndu lífinu.

Mannfjöldi kom saman í messu í nýlegri kirkju sem var reist skammt frá þeim stað þar sem gamla þjóðardómkirkjan stóð áður. Sú kirkja hrundi í skjálftanum.

Haítí er eitt fátækasta ríki heimsins og hafði skjálftinn einnig þær afleiðingar að forseti landsins, René Préval, tapaði kosningum árið 2011. Michel Martelly, sem áður var þekktur tónlistarmaður í landinu undir nafninu Sweet Micky, hefur verið forseti síðan þá.

Spilling er töluverð í landinu og hafa óeirðir brotist út á undanförnum mánuðum til að mótmæla ástandinu í landinu. Samkvæmt Sameinuðu þjóðunum hefur landið fengið um tíu milljarða bandaríkjadollara í aðstoð frá hörmungunum. Aðstoðin hefur bæði verið í formi neyðarvista og peninga.

Þrátt fyrir það er það mat alþjóðastofnana að ríflega helmingur þjóðarinnar lifi undir fátæktarmörkum. Ástandið virðist ekki ætla að skána í bráð en pattstaða ríkir á milli Martelly og þingsins og ófyrirséð hvenær úr henni leysist.