Spánverjinn lokaði búrinu

Þrjú-núll gefur ekki alveg rétta mynd af gangi leiks Manchester United og Liverpool á Old Trafford í gær. Gestirnir byrjuðu leikinn af krafti og sköpuðu sér í heildina fleiri færi en heimamenn. En David de Gea, markvörður United, reyndist Liverpool-mönnum óþægur ljár í þúfu í gær.

Þessi 24 ára gamli Spánverji varði alls átta skot í leiknum, mörg hver úr upplögðum færum og átti að öðrum ólöstuðum stærstan þátt í sigri United, sem var sá sjötti í röð í deildinni. Raheem Sterling komst til að mynda þrisvar einn gegn de Gea í leiknum, en alltaf varði Spánverjinn. Hann varði einnig í þrígang frá Mario Balotelli í seinni hálfleik.

Lofaður í hástert af Rodgers

Leikmenn United voru öllu beittari fyrir framan markið en erkifjendur þeirra. Wayne Rooney, Juan Mata og Robin van Persie skoruðu mörk United, en sá síðastnefndi hrósaði de Gea í hástert eftir leikinn:

„David var magnaður. Hann var stórkostlegur – það er ekki oft sem lið vinnur 3-0 og markvörður þess er maður leiksins,“ sagði hollenski framherjinn.

Brendan Rodgers, knattspyrnustjóri Liverpool, jós De Gea einnig lofi: „Við sköpuðum svo mörg færi, en David de Gea var maður leiksins. Hann hefur átt 4-5 svona leiki á tímabilinu. David er frábær markvörður, hann er góður að verja skot, auk þess sem hann kemur boltanum vel frá sér.“

Eins og Rodgers sagði var þetta ekki fyrsti stórleikur de Gea á tímabilinu. Spánverjinn, sem kom frá Atletico Madrid sumarið 2011, hefur stundum verið gagnrýndur fyrir að „vinna“ ekki nógu marga leiki fyrir sitt lið, en hann hefur svarað þeim gagnrýnisröddum með glæsibrag í vetur.

De Gea hefur haldið United á floti á löngum köflum og hefur tryggt sínu liði ófá stigin. Skemmst er að minnast frammistöðu hans gegn Everton, Arsenal, Stoke og nú síðast Liverpool, en í öllum þessum leikjum varði Spánverjinn frábærlega á mikilvægum augnablikum.

Aldrei með sömu varnarlínuna

Frammistaða de Gea á tímabilinu er aðdáunarverð, sérstaklega í ljósi þess að hann stendur fyrir aftan nýja varnarlínu í hverjum leik. Meiðsladraugurinn hefur ásótt United í vetur, og þá sérstaklega varnarmenn liðsins.

Til marks um óstöðugleikann hefur Louis van Gaal, knattspyrnustjóri United, notað 20 mismunandi samsetningar af miðvörðum í vetur. Það er af sem áður var þegar Rio Ferdinand og Nemanja Vidic stóðu jafnan vaktina í miðri vörn United fyrir framan Edwin van der Saar.

De Gea á talsvert í land með að komast á sama stall og United-goðsagnir á borð við Peter Schmeichel og van der Saar, en hann er alltaf að verða betri og það eru fáir markverðir sem standa honum framar í dag. De Gea er auk þess aðeins 24 ára og ætti því að eiga mörg góð ár framundan.