Fór yfir upphafið á endinum á ferli sínum hjá Manchester United

Hinn 37 ára gamli Ben Foster, einn besti markvörður ensku úrvalsdeildarinnar í dag, mætti í hlaðvarpsþátt Peter Crouch á dögunum og fór yfir ferilinn. Þar var helsta umræðuefni tími hans hjá Manchester United en Foster átti ekki sjö dagana sæla í treyju félagsins.

Foster var nokkuð óreyndur er Sir Alex Ferguson ákvað að kaupa markvörðinn frá Stoke City. Í kjölfarið var hann lánaður til Watford í tvö tímabil áður en hann var gerður að varamarkverði fyrir Edwin Van der Sar.

Áður en umræðan barst þangað var hann spurður út í sín fyrstu kynni af Roy Keane, þáverandi fyrirliða Man Utd og einum kröfuharðasta knattspyrnumanni allra tíma.

„Við vorum að spila á varaliðsleik á undirbúningstímabilinu og hann var í sinni hefðbundnu stöðu á miðri miðjunni. Við erum Man Utd svo við erum að stjórna spilinu og hann kom niður að sækja knöttinn svo ég gæti rúllað honum til hans.“ 

„Ég rúllaði knettinum víst of hægt til hans. Hann gjörsamlega missti það, stöðvaði boltann og hraunaði yfir mig. Skokkaði svo upp völlinn með boltann og hélt áfram að láta mig heyra það. Það kennir þér enginn að höndla svona aðstæður andlega,“ sagði Foster um sín fyrstu kynni af írska miðjumanninum.

Það var svo tveimur árum síðar sem hann var gerður að varamarkmanni Man utd en Van der Sar meiddistum sumarið og því var Foster aðalmarkvörður þegar tímabilið hófst.

„Ég byrjaði tímabilið nokkuð vel en eftir sjö eða átta leiki átti ég nokkra dapra leiki. Leikurinn sem gerði útslagið var svo 4-3 sigurinn gegn Manchester City á Old Trafford þar sem Michael Owen skoraði sem betur fer sigurmarkið á lokamínútu leiksins. Ég var út á þekju í þeim leik,“ segir Foster um leikinn en það var það sem gerðist inn í búningsherberginu sem virðist enn sitja í honum.

„Ég man að koma inn eftir leik og Sir Alex Ferguson tók mig á teppið. Hann skipaði öllum að hætta fagnaðarlátunum og lét mig heyra það fyrir framan alla. Sagði að ef ég gerði eitthvað þessu líkt aftur þá væri ég búinn hjá félaginu.“

Það var svo gegn Sunderland þar sem Foster gerði sín síðustu mistök fyrir Man Utd en hann spilaði varla leik fyrir félagið eftir það.

„Ég gerði skelfileg mistök gegn Sunderland. Kenwyne Jones, sem er vaxinn eins og skriðdreki, vann boltann af mér í loftinu og skoraði með skalla. Patrice Evra tókst samt að jafna metin undir lokin og ég þakkaði guði, hélt að mögulega hefði það bjargað mér en það dugði ekki. Eftir leik hraunaði Sir Alex aftur yfir mig og sagði mér að þetta væri endanlega búið, ég myndi bara spila með varaliðinu. Sem var svo raunin, ég var í varaliðinu það sem eftir var af leiktíðinni.“

Svo virðist sem Sir Alex hafi aðeins róast með árunum því ef miða má við þessar sögur hefði David De Gea átt að fjúka strax á sínu fyrsta tímabili hjá félaginu. Foster hefur þó unnið ágætlega úr sínum málum og er í dag sá markvörður ensku úrvalsdeildarinnar sem hefur varið flest skot allra markvarða í sögu deildarinnar. 

Foster hefur spilað 355 leiki í ensku úrvalsdeildinni fyrir Manchester United, Birmingham City, West Bromwich Albion og Watford. Þá hefur hann haldið hreinu í 88 af þessum 355 leikjum.