Aquilani: Ég vildi ekki fara frá Liverpool

Alberto Aquilani, ítalski miðjumaður Liverpool, segist aldrei hafa beðið um að fá að fara að láni frá félaginu.

Aquilani, sem verið hefur á láni hjá AC Milan og Juventus undanfarin tvö tímabil, segir við BBC að lífið hjá Liverpool hafa orðið erfitt eftir brotthvarf Rafa Benitez.

„Hvernig er hægt að líta framhjá leikmanni sem 20 milljónir punda hafa verið greiddar fyrir," er haft eftir Aquilani á BBC. Ítalski miðjumaðurinn var hugsaður til að fylla í skarð Xabi Alonso þegar sá síðarnefndi samdi við Real Madrid.

„Ég óskaði aldrei eftir því að fara heldur var ég undir þrýsingi frá félaginu. Hér er ég og mig langar að spila fyrir Liverpool. Það er hins vegar ekki eingöngu undir mér komið," segir Aquilani.

Hann segir forráðamenn félagsins, í stjórnartíð Roy Hodgson og Kenny Dalglish, hafa gert sér ljóst að best væri fyrir sig að far að láni.

„Ég held að fólkið í Liverpool eigi skilið að vita að ég óskaði aldrei eftir því að fara vegna þess að mér eða fjölskyldu minni leið illa. Það er ekki satt," segir Aquilani.

Ítalinn vonast til þess að fá tækifæri í stjórnartíð Brendan Rodgers.

„Ég átti mjög gott spjall við Brendan þar sem við skiptumst á skoðunum á jákvæðu nótunum," sagði Aquilainu.

„Ég kann vel við hans viðhorf til þess hvernig leika eigi knattspyrnu því það hentar leikstíl mínum vel."