Eftirspenna leyst úr læðingi

Ragnar Stefánsson jarðskjálftafræðingur segir jarðskjálftann sem varð nærri ströndum Súmötru í gær vera stiginu minni en þann stóra sem reið yfir á sömu slóðum á annan í jólum. Hann segir brotaplanið í stóra jólaskjálftanum hafa verið nálægt 1.000 kílómetra langt, en lengdin á brotalínu þessa nýja skjálfta sé ekki nema brot af því, sennilega á bilinu 100-200 km. Lóðrétta færslan hafi einnig verið mun minni. Í stóra skjálftanum fyrir þremur mánuðum hafi lóðrétta færslan á hafsbotninum verið um 10 metrar á einu bretti, en í skjálftanum í gær hafi hún sennilegast verið á bilinu 2-5 metrar. Fljóðbylgjan af þessum skjálfta hafi orðið eftir því minni. Aðspurður segir Ragnar allt benda til að kalla megi skjálfta gærdagsins eftirskjálfta eftir þann stóra. "Það má segja að þetta séu eftirhreyfingar á sömu skjálftasprungunni," segir hann. "Frá því stóri skjálftinn varð í desember hafa verið þarna skjálftar á línunni, frekar norðan til á henni, um 1.000 kílómetrum norðan við skjálftamiðjuna. Það hafa ekki verið svo miklir eftirskjálftar þarna sunnan til fyrr en núna," segir Ragnar. Eftirspennan í suðurhluta brotalínunnar hafi leystst úr læðingi með skjálftanum í gær. Miklar líkur eru á því að sögn Ragnars að mesta spennan sé farin af þessu brotasvæði nú. Hugsanlegt sé þó að í kjölfarið aukist spenna í nýjum brotalínum norður og suður af því. "Við þekkjum ekki sögu jarðhræringa á þessu svæði það vel, hvað er langt síðan skjálftar voru þar. Svona skjálftar eru mörg hundruð ár að byggjast upp," segir Ragnar. Þó sé vitað að bæði fyrir norðan og sunnan hefur byggst upp spenna í brotalínunum, en óljóst hvort sú spenna sé að nálgast það að leysast úr læðingi.