Stuart Pearce brjálaður

Enska U-21 árs landsliðið var hörmulegt á EM í sumar og þjálfarinn, Stuart Pearce, var í kjölfarið rekinn enda tapaði liðið öllum sínum leikjum. Pearce hefur þó ekki sagt sitt síðasta orð.

Hann hefur hraunað yfir nafngreinda leikmenn og enska knattspyrnusambandið er allt annað en sátt við það.

"Stór hluti af þessu gengi hafði með viðhorf leikmanna að gera. Manna eins og Oxlade Chamberlain og Phil Jones. Þeir vildu ekki koma. Um leið og þeir hafa farið í gegn gullfílabeinsturn A-landsliðsins þá skiptir U-21 árs landsliðið ekki máli," sagði Pearce grimmur.

Pearce lét einnig Gareth Bale heyra það fyrir að vilja ekki spila fyrir ÓL-landslið Breta sem Pearce stýrði. Bale gaf ekki kost á sér vegna meiðsla en lék með Spurs sama dag og landslið Breta spilaði sinn fyrsta leik.

"Mesta efni Bretland og hann vildi ekki fara á Ólympíuleikana. Hann var alls ekki einn um það. Það má samt spyrja menn eins og Ryan Giggs um hvernig þetta hafi verið og þeir munu segja að þetta hafi verið besta upplifun ferilsins."