Íslenski boltinn

Velgengni fótboltastelpnanna á Sauðárkróki kallar á stúkubyggingu

Óskar Ófeigur Jónsson skrifar
Tindastólsstelpurnar fagna hér marki í Lengjudeildinni í sumar.
Tindastólsstelpurnar fagna hér marki í Lengjudeildinni í sumar. Vísir/Sigurbjörn Andri Óskarsson

Tindastóll er búið að tryggja sér sigur í Lengjudeild kvenna og sæti í Pepsi Max deild kvenna í fyrsta sinn.

Velgengni fótboltastelpnanna á Sauðárkróki kallar á betri aðstöðu á svæðinu en þetta verður í fyrsta sinn sem Tindastóll á lið í efstu deild á Íslandsmótinu í knattspyrnu.

Besti árangurinn hjá kvennaliðinu fyrir þetta sumar var þriðja sætið sem liðið náði í Lengjudeildinni í fyrra en Stólarnir kom upp úr C-deildinni sumarið 2018. Kvennalið Tindastóll hefur því farið upp um tvær deildir á þremur árum.

Sveitarstjórn Sveitarfélagsins Skagafjarðar samþykkti á fundi sínum í gær að styrkja knattspyrnudeild Ungmennafélagsins...

Posted by Feykir on Fimmtudagur, 22. október 2020

Karlalið Tindastóls komst næst því að fara upp í efstu deild þegar liðið endaði í sjötta sæti í B-deildinni sumrin 1988, 1989 og 2000. Liðið komst líka í átta liða úrslit bikarkeppninnar sumarið 1988 en þá lék með liðinu hinn tvítugi Eyjólfur Sverrisson sem seinna átti eftir að gera garðinn frægan í atvinnumennsku og með íslenska landsliðinu.

Tindastólsstelpurnar voru því að klára sögulegt fótboltasumar á Sauðárkróki og árangur liðsins hefur vakið mikla lukku í bæjarfélaginu sem hefur hingað til verið þekkt fyrir að vera körfuboltabær.

Fréttasíðan Feykir segir frá því að það verði farið í uppbyggingu á stúku og viðeigandi aðstöðu við gervigrasvöllinn á Sauðárkróki fyrir tímabilið 2021. KS völlurinn þarf að uppfylla skilyrði mannvirkjanefndar KSÍ um leiki í efstu deild.

Tindastóll hefur unnið 15 af 17 leikjum sínum í Lengjudeildinni í sumar og markatala liðsins er 50-7.

Í frétt Feykis kemur einnig fram að sveitarstjórn Skagafjarðar hafi samþykkt að styrkja knattspyrnudeild Tindastóls um 1,7 milljónir króna vegna framúrskarandi árangurs meistaraflokks kvenna.

Samkvæmt heimildum Feykis hefur Fisk Seafood tilkynnt að fyrirtækið muni koma að því að byggja nýju stúkuna við KS völlinn á Sauðárkróki.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.