Frá og með mánudeginum verður Parísarbúum skylt að klæðast andlitsgrímum á meðan þeir ferðast í gegnum ákveðin fjölfarin svæði höfuðborgarinnar. Líkt og hér á landi hefur faraldur kórónuveirunnar sótt í sig veðrið á undanförnum vikum í Frakklandi.
Tilskipunin, sem tekur gildi eftir helgi, tekur til allra yfir ellefu ára aldri en ekki hefur verið greint nákvæmlega frá því um hvaða borgarhluta ræðir. Þá verður staðsetning grímuskyldra svæða í stanslausri skoðun yfirvalda.
Þegar hefur grímuskylda verið sett á í lokuðum rýmum en í gær greindust 2.288 með COVID-19 og er það hæsti fjöldi nýsmitaðra í seinni bylgju faraldursins þar í landi. Alls hafa um 235.000 tilfelli veirunnar greinst í Frakklandi og yfir 30 þúsund manns látist af völdun hennar.
Í yfirlýsingu yfirvalda í París sagði að hlutfall jákvæðra sýna í Parísarborg væri yfir meðaltali í landinu öllu. 2,4% samanborið við 1,6%, að jafnaði væru 400 manns að greinast með veiruna á hverjum degi í höfuðborginni, flestir á þrítugsaldri.
