Enski boltinn

Norwich vill vera stór fiskur í þeirri litlu tjörn sem Ísland er

Runólfur Trausti Þórhallsson skrifar
Ágúst Eðvald Hlynsson - leikmaður Víkings - í leik með Norwich City gegn Tottenham Hotspur.
Ágúst Eðvald Hlynsson - leikmaður Víkings - í leik með Norwich City gegn Tottenham Hotspur. Vísir/Norwich

Eftir stutt stopp í ensku úrvalsdeildinni mun Norwich City leika í ensku B-deildinni á næstu leiktíð. Liðið átti ekki viðreisnarvon og sat á botni úrvalsdeildarinnar nánast frá fyrstu umferð.

Liðið hefur undanfarin ár horft hýru auga til Íslands í leit að efnilegum leikmönnum, en af hverju?

Sem stendur er einn Íslendingur á mála hjá félaginu, Ísak Snær Þorvaldsson. Hann er á láni hjá St. Mirren að svo stöddu en þeir Ágúst Eðvald Hlynsson og Atli Barkarson – leikmenn Víkings Reykjavíkur í Pepsi Max deildinni – hafa báðir verið á mála hjá Norwich.

Ísak Snær í leik með Norwich City.Vísir/Norwich

Chris Lakey, blaðamaður Eastern Daily Press í Bretlandi, fór yfir stöðu mála og ástæður þess að Norwich sækist jafn mikið í íslenska leikmenn og raun ber vitni.

Þar segir að Gregg Broughton, sem tók við leikmannamálum akademíu liðsins ársins 2012, hafi horft til Íslands vegna þess hve margir atvinnumenn í fótbolta kæmu frá landinu miðað við höfðatölu. Einnig segir að íslenskir leikmenn eigi auðvelt með að aðlaga sig að breyttum aðstæðum.

Norwich áttu líka möguleika á að vera stór fiskur í lítilli tjörn þegar kemur að íslenskum markaði. Ef þeir ætluðu að herja á Frakkland til að mynda þá væru þeir að leita að nál í heystakki og ef þeir myndu finna téða nál þá væru stórlið Evrópu þegar á eftir henni.

Norwich taldi sig líka góðan stað fyrir leikmenn sem væru að taka sín fyrstu skref þar sem liðið er ekki staðsett í stórborg. Að fara frá Reykjavík til Lundúna eða Birmingham gæti ef til vill verið full stórt stökk fyrir unglinga í kringum 16 ára aldurinn en það var sá aldur sem Broughton var helst að leita í.

Broughton sá til þess að leikmenn eins og James Maddison [nú hjá Leicester City] og Max Aarons [sem hefur verið orðaður vð stærri lið] fengu tækifæri í byrjunarliði Norwich. Hann er þó ekki lengur í starfi sínu hjá Norwich en Broughton fluttist með fjölskyldu sína til Noregs. Þar starfar hann sem yfirmaður akademíu Bodø/Glimt. 

Íslenski hægri bakvörðurinn Alfons Sampsted leikur með aðalliði félagsins sem trónir á toppi norsku úrvalsdeildarinnar. 

Maddison og Todd Cantwell eru ástæður þess að Ágúst Eðvald fékk ekki fleiri tækifæri hjá Norwich samkvæmt Broughton. Þeir spiluðu sömu stöðu og Íslendingurinn svo tækifærin voru af skornum skammti.

Þó aðeins sé einn Íslendingur á launaskrá Norwich í dag - og hann sé á láni í Skotlandi - þá leggur vinna Broughton grunn sem gæti hjálpað Norwich þegar fram líða stundir. Mögulega eiga þeir eftir að leita aftur til Íslands þegar fram líða stundir.


Tengdar fréttir

Öll Íslendingaliðin héldu hreinu

Alls hafa þrír Íslendingar verið í eldlínunni með liðum sínum í dag. Eru liðin staðsett í Katar, Skotlandi og Noregi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.