Íslenski boltinn

Setti Íslandsmet með því að halda bolta á lofti í 104 mínútur og sannaði það með myndbandi

Óskar Ófeigur Jónsson skrifar
Knútur Haukstein Ólafsson í myndbandinu þar sem sjá má hann setja Íslandsmetið.
Knútur Haukstein Ólafsson í myndbandinu þar sem sjá má hann setja Íslandsmetið. Skjámynd/Youtube

Knútur Haukstein Ólafsson segist eiga Íslandsmetið í að halda knetti á lofti og það eru allar líkur á því að hann hafi rétt fyrir sér.

„Ég hélt boltanum á lofti í 1 klukkutíma og 44 mínútur. Og snertingarnar voru í það minnsta 11.582,“ sagði Knútur Haukstein Ólafsson við blaðamann Skagafrétta.

Heimsmetið í því að halda bolta á lofti á Milene Domingues frá Brasilíu. Hún hélt boltanum á lofti í 9 klukkutíma og 6 mínútur. Á þeim tíma náði hún 55.198 snertingum.

Það hefur ekki verið til skráð Íslandsmet í því að halda bolta á lofti fyrr en nú.

Knútur Haukstein Ólafsson segir í viðtalinu að hann sé einstaklingsmiðaður og liðsíþróttir hafi ekki átt við hann.

„Það er stór munur á þeim aðstæðum og að reyna að gera eitthvað slíkt í venjulegum fótboltaleik. Flestar af þessum brellum mínum myndu fáir komast upp með að gera í alvörufótboltaleik,“ sagði Knútur Haukstein. Hann hefur hæft sig í þessum hluta fótboltans frá því að hann var unglingur.

„Sumir eru góðir í því að halda bolta á lofti en eru ekkert sérstakir í öðru, og sumir eru ekkert sérstakir í því að halda bolta á lofti en eru samt sem áður frábærir atvinnumenn,“ sagði Knútur Haukstein en það má finna allt viðtalið við hann hér.

Knútur Haukstein Ólafsson tók það upp þegar hann hélt boltanum á lofti í einn klukkutíma og 44 mínútur og má sjá það hér fyrir neðan. Myndbandið er samt bara tæpar nítján mínútur á lengd því hann sýnir það mjög hratt.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.