Frank de Boer hafnaði Liverpool

Hollendingurinn Frank de Boer afþakkaði boð eigenda Liverpool um atvinnuviðtal hjá félaginu. „Ég er rétt að byrja hjá Ajax," sagði hann.

Liverpool hefur verið að leita af eftirmanni Kenny Dalglish sem var rekinn úr starfi knattspyrnustjóra liðsins í síðustu viku.

De Boer hefur gert Ajax að hollenskum meisturum bæði ár sín hjá félaginu en liðið vann titilinn í vor eftir frábæran lokasprett á tímabilinu. Kolbeinn Sigþórsson leikur undir stjórn hans hjá Ajax.

„Þetta er mikill heiður fyrir mig en ég er rétt að byrja hjá Ajax," sagði hann við hollenska fjölmiðla í dag. „Ég mun halda tryggð við Ajax næstu árin."

De Boer er ekki fyrsti stjórinn sem hafnar Liverpool en þeir Brendan Rodgers hjá Swansea og Jürgen Klopp, stjóri Dortmund í Þýskalandi, gerðu slíkt hið sama.

Þeir Roberto Martinez og Andre Villas-Boas eru nú helst orðaðir við starfið. Þá er Rafael Benitez einnig sagður afar áhugasamur um starfið en eigendur Liverpool hafa þó ekki sett sig í samband við hann.