Hefur skorað meira en helmingur liða í deildinni | Myndband

Liverpool er komið á ógnarskrið í ensku úrvalsdeildinni. Liðið hefur unnið síðustu þrjá leiki sína samanlagt með fjórtán mörkum gegn tveimur en í gær fóru þeir rauðklæddu illa með Tottenham í Lundúnum, 5-0. Líkast til er enginn að spila betur í ensku úrvalsdeildinni en Luis Suarez – sem hefur skorað átta mörk í þessum þremur leikjum og er kominn með sautján mörk alls á tímabilinu.

Tíu lið, þar á meðal Tottenham, hafa ekki einu sinni náð að skora svo mörg mörk í deildinni í vetur og er þá frátalin sú staðreynd að Suarez var í banni í fyrstu fimm leikjum tímabilsins.

„Ég reyni mitt besta á vellinum. Ég er sóknarmaður og reyni að skora. Það mikilvægasta er frammistaða liðsins. Við spiluðum mjög vel,“ sagði hógvær Luis Suarez en stjóri hans, Brendan Rodgers, vildi ekki gera mikið úr einstaklingsafreki Suarez eftir leikinn. Hann lofaði frekar liðið allt.

„Við skoruðum fimm mörk en hefðum auðveldlega getað skorað sjö eða átta. Ég er ekki í vafa um að þetta sé besta heildarframmistaða liðsins síðan ég tók við,“ sagði Rodgers.

Suarez og Cristiano Ronaldo, leikmaður Real Madrid, hafa báðir skorað sautján deildarmörk á tímabilinu. Ronaldo er þó búinn að spila fleiri leiki (fimmtán) og skora fleiri mörk úr vítum (fjögur).

Suarez hefur einmitt lengi vel verið orðaður við Real Madrid en það er ljóst að verðmiðinn á kappanum verður aðeins hærri með hverjum leiknum sem líður.

Arsenal gaf eftir í toppbaráttunni um helgina með 6-3 tapi gegn Manchester City í ótrúlegum leik á laugardaginn. Liverpool og Chelsea náðu því að minnka forystu Lundúnaliðsins á toppnum í tvö stig en City og Everton fylgja á eftir í humátt.

Manchester United kom sér svo á sigurbraut á ný með 3-0 útisigri á Aston Villa í gær þar sem Danny Welbeck skoraði tvö fyrstu mörk United.