Moyes vill annað tækifæri í Meistaradeildinni

David Moyes, sem rekinn var sem knattspyrnustjóri Manchester United í apríl, er að eigin sögn búinn að hafna nokkrum tilboðum frá liðum sem vilja fá hann sem knattspyrnustjóra.

Skotinn vill komast að hjá liði sem er í Meistaradeildinni en honum fannst hann sanna að hann gæti þjálfað í sterkustu deild Evrópu á síðasta tímabili.

Moyes kom Manchester United í átta liða úrslitin án mikilla vandræða og vill nú annað tækifæri til að stýra liði í Meistaradeildinni.

"Ég fékk að prófa Meistaradeildina almennilega í fyrsta skipti á síðustu leiktíð og ég tel mig hafa sýnt að ég réð við það," segir Moyes í viðtali við Guardian.

"Ég vil komast að hjá liði sem gefur mér tækifæri á að þjálfa í Meistaradeildinni eða liði sem hefur metnað til að komast þangað."

"Það gæti bæði verið á Englandi eða utan þess. Ég hef alltaf verið opinn fyrir því að víkka sjóndeildarhringinn og læra meira. Sem stendur líður mér bara ágætlega að fylgjast með og læra," segir David Moyes.