Keane: Neville ekki jafn áhrifamikill og fólk heldur

Roy Keane, fyrrum fyrirliði Manchester United, furðar sig á því að Gary Neville fái að halda áfram að starfa í sjónvarpi þrátt fyrir að hafa verið tekinn inn í þjálfaralið enska landsliðsins.

Neville hefur slegið í gegn sem álitsgjafi í bresku sjónvarpi eftir að hann lagði skóna á hilluna. Hann var svo nýverið ráðinn í þjálfarateymi Roy Hodgson hjá enska landsliðinu.

„Gary getur vissulega talað um fótbolta en fólk skal ekki halda í eina mínútu að hann hafi haft jafn mikil áhrif í búningsklefanum og margir vilja meina," sagði Keane.

„Gary sagði sína meiningu á hlutunum en hann var ekki aðalmaðurinn á svæðinu - langt í frá."

„Ég efast því um að hann muni fara inn í enska landsliðið og stjórna öllu þar. Þetta verður dýrmæt reynsla fyrir hann og hans hlutverk verður fyrst og fremst að vera milligöngumaður á milli leikmanna og þjálfarans. Hann er góður í því," bætti Keane við.

„En það kemur mér á óvart að hann fái að halda áfram að vinna í sjónvarpinu. Það gæti reynst honum erfitt og ég á von á því að hann muni ekki gagnrýna leikmenn með sama hætti og hann hefur gert."