Erlent

Trump rangtúlkar orð Zelensky og segist hreinsaður af sök

Samúel Karl Ólason skrifar
Zelensky hefur reynt að halda sig frá málinu að miklu leyti en þrátt fyrir það hafa viðtöl við embættismenn í Úkraínu sýnt að forsetinn og aðstoðarmenn hans ætluðu sér að verða við kröfum Trump og stóð það til.
Zelensky hefur reynt að halda sig frá málinu að miklu leyti en þrátt fyrir það hafa viðtöl við embættismenn í Úkraínu sýnt að forsetinn og aðstoðarmenn hans ætluðu sér að verða við kröfum Trump og stóð það til. AP/Alex Brandon

Volodymyr Zelensky, forseti Úkraínu, er ekki þeirrar skoðunar að umdeilt símtal hans og Donald Trump, forseta Bandaríkjanna, hafi falið í sér svokallað „kaup kaups“ (e. Quid pro quo). Hann gagnrýndi Bandaríkin þó harðlega fyrir að koma fram við Úkraínu sem peð í pólitískri skák. Þó reyndi Zelensky enn einu sinni að forðast það að dragast inn í rannsókn fulltrúadeildar Bandaríkjaþings á því hvort Trump hafi brotið af sér í starfi, meðal annars með því að halda aftur af neyðaraðstoð til Úkraínu með því markmiði að þvinga Zelensky til að tilkynna að hann hefði opnað tvær rannsóknir í Úkraínu sem myndu nýtast Trump í forsetakosningum á næsta ári.

„Sko, ég talaði ekki við forsetann frá stöðu „kaup kaups“. Ég geri hlutina ekki þannig,“ sagði Zelensky í viðtali við Time og aðra miðla.

Zelensky sagði Úkraínumenn ekki eiga séns í að ná aftur því landsvæði sem Rússar tóku árið 2014, án stuðnings Bandaríkjanna og annarra ríkja. Hann sagði einnig að ummæli Trump og bandamanna hans um að Úkraína væri gjörspillt ríki kæmu niður á tækifærum ríkisins til að verða sér út um fjárhagsaðstoð í baráttunni við Rússa og aðskilnaðarsinna sem þeir styðja.

Þá gagnrýndi hann Trump fyrir að halda aftur af tæplega 400 milljóna dala neyðaraðstoð til Úkraínu, eftir að þing Bandaríkjanna hafði samþykkt aðstoðina. Zelensky sagði það ekki endilega snúa að „kaupum kaups“ heldur almennri sanngirni.

„Ég held að allir í Úkraínu séu orðnir mjög þreyttir á Burisma. Við höfum okkar eigin ríki. Við höfum okkar sjálfstæði, við höfum okkar vandamál og spurningar,“ sagði Zelensky.

Trump rangtúlkaði ummæli Zelensky þó í samtali við fjölmiðla í dag, þegar hann sagði að Zelensky hefði hreinsað sig af allri sök. Það gerði Zelensky ekki.

Zelensky hefur reynt að halda sig frá málinu að miklu leyti en þrátt fyrir það hafa viðtöl við embættismenn í Úkraínu sýnt að forsetinn og aðstoðarmenn hans ætluðu sér að verða við kröfum Trump og stóð það til. Eftir að kvörtun uppljóstrara leit dagsins ljós beitti þingið Trump þó miklum þrýstingi vegna aðstoðarinnar og var hún afhent nokkrum dögum áður en Zelensky átti að fara í viðtal hjá CNN þar sem hann ætlaði að lýsa yfir upphafi rannsóknanna tveggja sem Trump vildi.

Sjá einnig: Sluppu með naumindum við að verða við kröfum Trump

Vitnisburður embættismanna á síðustu vikum hefur varpað ljósi á að Trump skipaði embættismönnum að vinna með Rudy Guiliani, einkalögmanni hans, varðandi málefni Úkraínu og þvinguðu þeir forsvarsmenn ríkisins til að lýsa því yfir opinberlega að Úkraínumenn ætluðu sér að rannsaka pólitískan andstæðing forsetann og aðra rannsókn sem grafa átti undan Rússarannsókninni svokölluðu og Landsnefnd Demókrataflokksins.

Lítið til í ásökunum Trump

Forsetinn og bandamenn hans hafa sakað Joe Biden um spillingu vegna þess að hann þrýsti á úkraínsk stjórnvöld að reka saksóknara á sama tíma og Hunter, sonur hans, sat í stjórn olíufyrirtækisins Burisma Holdings. Það eigi Biden að hafa gert til að stöðva rannsókn sem beindist að Burisma, samkvæmt kenningu Trump-liða og vill forsetinn að Úkraínumenn rannsaki það.

Ekkert hefur þó komið fram sem bendir til þess að Biden-feðgarnir hafi gert nokkuð ólöglega eða að rannsókn hafi yfir höfuð staðið yfir á Burisma á þeim tíma sem þáverandi varaforsetinn reyndi að koma saksóknara frá. Sú viðleitni var hluti af alþjóðlegum þrýstingi þar sem vestræn ríki töldu saksóknarann ljón í vegi þess að uppræta langvarandi spillingu í Úkraínu.

Hin rannsóknin tengist samsæriskenningu um tölvupóstþjón landsnefndar Demókrataflokksins sem rússneskir hakkarar brutust inn í fyrir forsetakosningarnar 2016 og láku vandræðalegum póstum í gegnum Wikileaks. Trump hefur lengi verið gramur vegna niðurstöðu bandarísku leyniþjónustunnar að rússnesk stjórnvöld hafi háð upplýsingastríð og framið tölvuinnbrot til að hjálpa honum til sigurs.

Trump og bandamenn hans hafa því haldið þeirri hugmynd á lofti um að það hafi í reynd verið úkraínskir útsendarar sem frömdu innbrotið í tölvupóstþjón demókrata og að þeir hafi bókstaflega falið áþreifanlegan tölvupóstþjón í Úkraínu. Markmiðið hafi verið að koma sök á Rússa. Það er, eins og áður hefur komið fram, þvert á öll sönnunargögn og niðurstöður öryggisstofnanna í bandaríkjunum og sérfræðinga.

Þessu hafa Trump-liðar og þar með talnir nokkrir þingmenn, haldið áfram að dreifa. Þrátt fyrir að embættismenn og forsvarsmenn öryggisstofnanna hafi varað þá við því að ásakanirnar gegn Úkraínu séu runnar undan rifjum þeirra sömu Rússa og gerðu árásina á tölvukerfi Landsnefndar Demókrataflokksins.


Tengdar fréttir

Ummæli Trumps sögð ganga í berhögg við hans eigin orð

Donald Trump Bandaríkjaforseti neitaði því í gær að hafa beðið Rudy Giuliani, persónulegan lögmann sinn, um að fara til Úkraínu í þeim tilgangi að ýta á eftir rannsóknum þar í landi fyrir hönd forsetans.

Ný gögn sýna fram á samskipti Pompeo og Giuliani

Gögn sem utanríkisráðuneyti Bandaríkjanna hefur afhent samtökunum American Oversight eftir aðgangsbeiðni þeirra sýna fram á ítrekuð samskipti utanríkisráðherra Bandaríkjanna, og Rudy Giuliani, persónulegs lögmanns Trump.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.