Liverpool var hársbreidd frá fyrsta deildartapi sínu á tímabilinu en náði á dramatískan hátt að fara með sigur þegar liðið mætti Aston Villa í dag.



Andy Robertson skoraði jöfnunarmark Liverpool undir lok venjulegs leiktíma og Sadio Mane tryggði Liverpool sigurinn í uppbótartíma.



„Við höfum sýnt seiglu síðustu 18 mánuði og á þessu tímabili höfum við bara haldið áfram,“ sagði Robertson eftir leikinn.



„Við fengum nokkur frábær færi í þessum leik en það er ekkert betra en sigurmark á síðustu mínútunum.“



„Aston Villa er nýliði og þeir héldu pressu á okkur allan leikinn. Við þurfum að vera upp á okkar besta í hverjum einasta leik.“



Með sigrinum hélt Liverpool sex stiga forskoti á Manchester City á toppi ensku úrvalsdeildarinnar.