Enski boltinn

„Augu hans voru galopin en ég reyndi að halda utan um hann og tala við hann“

Óskar Ófeigur Jónsson skrifar
Cenk Tosun hefur hér tekið utan um Andre Gomes á meðan aðrir átta sig á alvarleika meiðslanna.
Cenk Tosun hefur hér tekið utan um Andre Gomes á meðan aðrir átta sig á alvarleika meiðslanna. Getty/Robbie Jay Barratt

Meiðsli Everton mannsins Andre Gomes fengu mikið á marga sem á horfðu ekki síst aðra leikmenn á vellinum.

Andre Gomes fer í aðgerð í dag eftir að hafa meiðst mjög illa á hægri ökkla í leik Everton og Tottenham á Goodison Park í gær.

Andre Gomes fór úr ökklalið og ökklabrotnaði. Tottenham-maðurinn Son Heung-min fékk að líta rauða spjaldið fyrir brotið og fór grátandi af velli.

Einn af þeim sem kom til Andre Gomes strax eftir atvikið var tyrkneski framherjinn Cenk Tosun sem var nýkominn inn á sem varamaður. Cenk Tosun átti seinna eftir að tryggja Everton jafntefli með marki í uppbótatíma.



Cenk Tosun lýsti sinni upplifun af meiðslum Andre Gomes í viðtali við breska ríkisútvarpið eftir leikinn.

„Það eru allir leiðir inn í sér. Sumir leikmenn fóru næstum því að gráta,“ sagði Cenk Tosun.

„Andre var í sjokki. Augu hans voru svo galopin. Hann var grátandi, hrópandi og öskrandi,“ sagði Tosun.

„Ég reyndi bara að halda utan um hann og tala við hann. Ég sagði honum að reyna að vera rólegur. Við skildum samt ekki hvað hann var að segja,“ sagði Tosun.

Cenk Tosun tjáði sig líka um atvikið á Instagram-reikningi sínum.

„Þú vinnur, þú gerir jafntefli eða þú tapar. Það skiptir hins vegar engu máli þegar svona gerist. Ég vildi óska þess að ég hefði ekki skorað. Ég vildi óska að við hefðum tapað 5-0 og að þetta hefði ekki gerst. Ég veit samt að þú kemur sterkari til baka Andre og við verðum hér til að styðja þig,“ skrifaði Cenk Tosun.




Marco Silva, knattspyrnustjóri Everton, hrósaði leikmönnum sínum fyrir viðbrögð sín inn á vellinum.

„Þetta var skelfileg stund fyrir okkur og okkar lið. Þetta snerist um meira en bara fótboltaleik,“ sagði Marco Silva.

„Við munum gefa Andre og fjölskyldu hans allan okkar stuðning. Við sem hópur verðum að standa þétt saman og sýna þann anda sem við sýndum eftir atvikið,“ sagði Marco Silva.

„Leikmenn okkar eru leiðir núna. Þetta var erfið stund í búningsklefanum og erfið stund fyrir Andre. Hann er mjög illa meiddur en ég er hundrað prósent viss um að Andre kemur sterkari til baka, bæði sem fótboltamaður og sem manneskja. Hann er frábær drengur og frábær fagmaður,“ sagði Marco Silva.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.