Íslenski boltinn

Jón Þór mun ræða við Cloe: „Hikum ekki við að velja hana ef svo ber undir“

Ástrós Ýr Eggertsdóttir skrifar
Jón Þór ásamt aðstoðarþjálfara sínum Ian Jeffs.
Jón Þór ásamt aðstoðarþjálfara sínum Ian Jeffs. vísir/vilhelm
Jón Þór Hauksson, landsliðsþjálfari kvenna í fótbolta, ætlar sér að ræða við Cloe Lacasse nú þegar hún er komin með íslenskan ríkisborgararétt. Fótbolti.net greindi frá þessu í dag.



Í gær var tillaga allsherjar- og menntamálanefndar um að veita 32 einstaklingum, þar á meðal Cloe Lacasse, íslenskan ríkisborgararétt samþykkt á Alþingi. Cloe, sem er frá Kanada, er því orðin íslenskur ríkisborgari og gjaldgeng í íslenska landsliðið.



„Cloe er frábær leikmaður og hefur staðið sig frábærlega í Pepsi Max-deildinni í mörg ár. Hún hefur frábæra kosti sem fótboltamaður og kemur að sjálfsögðu greina í íslenska landsliðið eins og allir frábærir leikmenn,“ sagði Jón Þór í viðtali við Fótbolta.net í dag.



„Hún kemur til greina í þau verkefni sem framundan eru. Ef við teljum að hún eigi erindi í okkar lið eða henti okkar leik þá hikum við ekki við að velja hana ef svo ber undir.“



Cloe hefur leikið á Íslandi frá því sumarið 2015, allan þann tíma með ÍBV. Hjá ÍBV lék Cloe undir stjórn Ian Jeffs, en hann er aðstoðarlandsliðsþjálfari í dag.



Ísland hefur leik í undankeppni EM 2021 í haust og eru tveir leikir á móti Ungverjalandi og Slóvakíu á Laugardalsvelli næstu verkefni eftir æfingaleiki síðustu mánuði.



Jón Þór hefur enn ekki rætt við Cloe, enda stutt síðan hún varð gjaldgeng í landsliðið. Hann stefnir þó á að hitta hana og ræða við hana.

Tengd skjöl


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.