Enski boltinn

Terry: Fullkominn tími fyrir Frank Lampard að fara aftur heim til Chelsea

Óskar Ófeigur Jónsson skrifar
John Terry og Frank Lampard fagna saman með Englandsbikarinn árið 2006 og við hlið þeirra er góðvinur þeirra Eiður Smári Guðjohnsen.
John Terry og Frank Lampard fagna saman með Englandsbikarinn árið 2006 og við hlið þeirra er góðvinur þeirra Eiður Smári Guðjohnsen. Getty/Gareth Cattermole

John Terry, fyrrum fyrirliði Chelsea, er himinlifandi með fréttirnar af því að góðvinur hans og fyrrum liðsfélagi, Frank Lampard, sé líklega næsti knattspyrnustjóri Chelsea.

Hinn 41 árs gamli Frank Lampard er núverandi knattspyrnustjóri Derby County en forráðamenn Derby hafa gefið honum leyfi til að tala við Chelsea.

Chelsea er að leita sér að nýjum knattspyrnustjóra eftir að Maurizio Sarri yfirgaf Stamford Bridge og tók við ítalska félaginu Juventus.

„Þetta er fullkominn tími fyrir bæði hann og félagið,“ sagði John Terry í viðtali við Daily Mail. John Terry lék með Chelsea frá 1998 til 2017 en Lampard kom til félagsins árið 2001 og lék með því til 2014.

„Lamps er goðsögn og nú er rétti tíminn fyrir hann til að koma heim,“ sagði Terry.




John Terry er í dag aðstoðarknattspyrnustjóri Dean Smith hjá Aston Villa en nýlokið tímabil var það fyrsta hjá honum eftir að Terry setti knattspyrnuskóna upp á hillu.

John Terry er viss um að Lampard sé sérstaklega góður kostur fyrir Chelsea nú þegar félagið er í félagsskiptabanni og getur ekki keypt nýja leikmenn. „Með því að hafa Frank í brúnni þá fá ungir leikmenn félagsins alvöru trú á það að þeir eigi möguleika á að vinna sig inn í aðalliðið hjá Chelsea,“ sagði Terry.

Frank Lampard kom Derby County alla leið í umspil um laust sæti í ensku úrvalsdeildinni á sínu fyrsta tímabili en liðið tapaði fyrir Aston Villa í úrslitaleiknum á Wembley.



„Eftir þetta tímabil hans með Derby og sú staðreynd að Chelsea sé í félagsskiptabanni gerir það að verkum að enginn annar er betri í þetta starf en Frank,“ sagði Terry.

John Terry og Frank Lampard léku saman í fjórtán ár hjá Chelsea og unnu saman þrettán titla með félaginu þar á meðal ensku deildina þrisvar, enska bikarinn fjórum sinnum, enska deildabikarinn tvisvar, Meistaradeildina árið 2012 og loks Evrópudeildina 2013 sem var þeirra síðasti titill Terry og Lampard saman með Chelsea.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.