Ef Chelsea vill fá Frank Lampard sem knattspyrnustjóra þarf félagið að greiða Derby County fjórar milljónir punda í bætur.

Lampard þykir langlíklegastur til að taka við Chelsea af Maurizio Sarri sem er á leið til Ítalíumeistara Juventus.

Lampard tók við Derby County síðasta sumar og samningsbundinn félaginu til 2021. Derby tapaði fyrir Aston Villa, 2-1, í úrslitaleik umspilsins um sæti í ensku úrvalsdeildinni.

Lampard gekk í raðir Chelsea á þessum degi árið 2011. Hann lék með Chelsea í 13 ár og vann ellefu stóra titla með félaginu. Lampard er markahæsti leikmaður í sögu Chelsea.

Í gærkvöldi bárust fréttir af því að Sarri hefði fengið grænt ljós frá Chelsea til að taka við Juventus. Þetta verður þó væntanlega ekki gert opinbert fyrr en Chelsea finnur eftirmann hans.

BBC greinir frá því að Chelsea hafi ekki enn haft samband við Derby. Það gerist þó væntanlega fyrr en seinna.