Upphitun: Stór dagur í Meistaradeildarbaráttunni

Fram undan er risadagur í baráttunni um fjórða sætið í ensku úrvalsdeildinni, Aron Einar Gunnarsson verður í eldlínunni í fallbaráttuslag og Gylfi Þór Sigurðsson leggur land undir fót.

Síðasti leikur dagsins í ensku úrvalsdeildinni er jafnframt stórleikur helgarinnar, viðureign Arsenal og Chelsea á Emirates.

Chelsea situr í fjórða sæti eftir 22 umferðir með 47 stig. Sex stigum neðar er Arsenal í fimmta sætinu. Manchester United tórir svo í sjötta sæti með 41 stig eins og Arsenal.

Vinni Chelsea er brekkan orðin heldur brött fyrir Arsenal og verða Skytturnar að ná í sigur til þess að halda spennu í leikum. Úrslitin sem stuðningsmenn Manchester United vonast hins vegar eftir eru jafntefli því þá getur liðið heldur betur sótt á bæði lið með sigri gegn Brighton.

Ole Gunnar Solskjær hefur farið frábærlega af stað með Manchester United, svo vel hefur hann byrjað að enginn stjóri hefur byrjað eins vel í sögu þessa stórveldis.

Þó Brighton hafi unnið United í haust þá ætti leikurinn á Old Trafford að vera svokallaður skyldusigur fyrir Paul Pogba og félaga.

Topplið Liverpool fær Crystal Palace í heimsókn á Anfield. Liðið vann torsóttan sigur á Brighton um síðustu helgi og komst því aftur á sigurbraut eftir fyrsta tap tímabilsins í deildinni gegn Manchester City.

Öll Íslendingaliðin þrjú eru í eldlínunni í dag. Aron Einar Gunnarsson og félagar í Cardiff sækja Newcastle heim í risastórum leik í fallbaráttunni, Newcastle er í fallsæti með 18 stig, Cardiff sæti ofar með 19 stig.

Everton siglir lygnan sjó um miðja deild, Gylfi og félagar sækja Southampton heim á suðurströndina. Burnley fer til Watford og heldur áfram leit sinni að mikilvægum stigum til þess að tryggja veru sína í deildinni. Jóhann Berg Guðmundsson verður þó að öllum líkindum ekki með Burnley þar sem hann er enn að berjast við meiðsli.

Leikir dagsins:

12:30 Wolverhampton Wanderers - Leicester City, í beinni á Stöð 2 Sport

15:00 Bournemouth - West Ham United

15:00 Liverpool - Crystal Palace

15:00 Manchester United - Brighton and Hove Albion, í beinni á Stöð 2 Sport

15:00 Newcastle United - Cardiff City

15:00 Southampton - Everton

15:00 Watford - Burnley

17:30 Arsenal - Chelsea, í beinni á Stöð 2 Sport