Fær meira en milljarð frá kín­verska ríkinu

Eileen Gu hefur unnið tvö silfurverðlaun í skíðafimi á Ólympíuleikunum í ár, eitt í brautarkeppni og eitt í keppni af stórum palli. Hin 22 ára gamla íþróttakona, sem er fædd og uppalin í Bandaríkjunum, hefur keppt fyrir heimaland móður sinnar, Kína, síðan 2019 og er ein af stærstu stjörnum Ólympíuleikanna.

Samkvæmt Forbes er hún ein af fimm launahæstu íþróttakonum heims og hefur ársinnkomu upp á rúmlega 2,8 milljarða íslenskra króna.

Mikið af peningunum kemur frá kostunarsamningum við stórfyrirtæki eins og Louis Vuitton, Porsche og Red Bull.

Samkvæmt Wall Street Journal fær Gu einnig mikinn fjárhagslegan stuðning frá Kína.

Í opinberum fjárlögum fyrir árið 2025 var nafn Gu með í misgáningi. Samkvæmt upplýsingunum hafa hundrað milljónir júana, um 1,7 milljarðar króna, verið veittar henni og listskautakonunni Zhu Yi á síðustu þremur árum.

Óljóst er hversu stór hluti peninganna fór til hvorrar íþróttakonu, en meirihlutinn á að hafa lent á bankareikningi Gu. Upplýsingarnar voru harðlega gagnrýndar í Kína þegar þær komu fram og nöfn stjarnanna voru fljótt fjarlægð úr skjölunum.

Gu keppti fyrst fyrir Kína á Ólympíuleikunum í Peking fyrir fjórum árum og vann þá tvö gull og eitt silfur.