Berbatov var nálægt því að fara til Sunderland

Dimitar Berbatov segist hafa átt í viðræðum við enska úrvalsdeildarliðið Sunderland í janúarglugganum.

Búlgarski framherjinn hefur verið án félags síðan hann yfirgaf PAOK frá Grikklandi síðasta sumar. Hann var þó nokkuð nálægt því að ganga í raðir botnliðs ensku úrvalsdeildarinnar í janúarglugganum.

„Ég vil halda áfram að spila. Ég ræddi við nokkra þjálfara hjá Sunderland en á endanum gerðist ekkert,“ sagði Berbatov sem er ekki tilbúinn að leggja skóna á hilluna strax.

„Mig langar að spila aðeins lengur. Einn leik í viðbót, eitt ár í viðbót. Bara njóta þess að vera með liðsfélögunum og spila fyrir áhorfendurna.“

Berbatov lék í ensku úrvalsdeildinni á árunum 2006-14 og vill ólmur snúa aftur þangað.

„Allir leikmenn vilja spila í ensku úrvalsdeildinni. Þegar þú hefur spilað þar viltu gera það aftur. Við sjáum til hvað gerist,“ sagði Berbatov sem skoraði 94 mörk í 229 leikjum í ensku úrvalsdeildinni fyrir Tottenham, Manchester United og Fulham.