Höfðu varað við flóðum um árabil

Minnst 290 eru látnir eftir mannskæða aurskriðu í suðurhluta Kólumbíu á laugardaginn. Gífurlegt magn vatns, grjóts, braks, timburs og aurs fór yfir stóran hluta Mocoa og um 330 eru slasaðir og fjölda manna er enn saknað. Stór hluti hinna látnu eru börn.

Sérfræðingar,  ríkisstofnanir og náttúruverndarsamtök höfðu varað við mögulegum flóðum um árabil. Íbúar voru jafnvel meðvitaðir um viðvaranirnar en hunsuðu þær. Þrátt fyrir allar viðvaranir hélt Macoa áfram að stækka inn á svæðið sem þótti hvað hættulegast.

Ástandið hafði versnað á undanförnum árum vegna mikils skógarhöggs.

Þegar rigning sem samsvarar meðalrigningu eins mánaðar féll af himnum ofan á föstudagskvöldið og laugardagsmorgun féll aurskriðan á bæinn.

AP fréttaveitan hefur rætt við íbúa og þar á meðal var hin 68 ára gamla Deya Maria Toro. Hún vaknaði snemma um laugardagsmorguninn og áttaði sig á aðstæðunum. Hún flúði af svæðinu, en margir aðrir voru ekki svo heppnir.

Þrjár af sex nærliggjandi ám Mocoa flæddu yfir bakka sína og úr urðu einhverjar verstu náttúruhamfarir undanfarinnar ára í Kólumbíu.

Meðal heimilda sem fjölmiðlar ytra hafa bent á er skýrsla frá Landbúnaðarráðuneyti landsins sem skrifuð var árið 1989. Þar var varað við mögulegu flóði eins og lenti á Macoa um helgina. Þar að auki varaði þróunarfyrirtæki einnig við flóðum eftir að orkuver var byggt í bænum árið 1995. Aurskriðan eyðilagði orkuverið.

Carlos Garces, sem flutti til Mocoa ásamt eiginkonu sinni og syni fyrir rúmum áratug, sagði hamfarirnar vera stjórnvöldum að kenna fyrir að hafa leyft þeim að byggja hús á svæðinu.

„Það vissu allir að það kæmi flóð, en enginn gerði neitt.“

Áætlað er að um helmingur íbúa Mocoa, þar sem um 40 þúsund manns búa, hafi flutt til bæjarins eftir að hafa flúið átök annarsstaðar í landinu. Gífurleg uppbygging húsa hefur átt sér stað þar á síðustu tíu árum.

Ríkissaksóknari Kólumbíu tilkynnti í gær að rannsókn væri hafin og yfirheyra ætti bæjarstjóra Mocoa og aðra embættismenn.