Scudamore: Flestir stjórar vildu lokun gluggans

Í dag var tekin ákvörðun um að loka félagsskiptaglugganum í ensku úrvalsdeildinni fyrr á næsta tímabili. SkySports heyrði hljóðið í Richard Scudamore, forseta deildarinnar, eftir að niðurstaðan var kunngerð fyrr í dag.

„Kosningin var ekki einróma, en það var enginn óheyrilega reiður með niðurstöðuna,“ sagði Scudamore. Samkvæmt heimildum Sky voru 14 félög af 20 sem greiddu atkvæði með breytingunni. 5 voru á móti og 1 sat hjá.

„Það voru áhyggjuraddir frá sumum félögum vegna þess að þó þau gætu ekki keypt inn nýja leikmenn, þá gætu önnur félög þar sem glugginn er opinn lengur keypt þeirra leikmenn. Þess vegna gátu þau ekki stutt tillöguna.“

Sjá einnig: Glugganum verður lokað fyrr næsta sumar

„Við héldum fund með knattspyrnustjórum fyrir tímabilið. Þeir voru með mjög sterka skoðun á þessu. Næstum allir vildu loka glugganum fyrr. Félögunum finnst það rangt að í fyrsta leik tímabilsins gætu þau mætt leikmanni sem svo nokkrum vikum seinna gæti spilað fyrir annað félag.“

Mikið hefur verið um að leikmenn spili ekki með sínum félagsliðum þar sem óvissa ríkir í kringum framtíð þeirra. Gylfi Þór Sigurðsson spilaði ekkert með Swansea í byrjun tímabilsins, eins og Alexis Sanchez hjá Arsenal og Philippe Coutinho hjá Liverpool.