Koeman: Gylfi mun spila á móti Manchester City

Ronald Koeman, knattspyrnustjóri Everton, er búinn að lofa því að Gylfi Þór Sigurðsson spili sinn fyrsta leik með Everton annað kvöld.

Everton heimsækir þá Manchester City í lokaleik annarrar umferðar ensku úrvalsdeildarinnar en bæði lið unnu sína leik í fyrstu umferð.

Everton gekk frá kaupunum fá Gylfa í síðustu viku en íslenski landsliðsmaðurinn varð þar með dýrasti knattspyrnumaður Everton frá upphafi.

Everton spilar þrjá leiki á næstu sex dögum, tvo í ensku úrvalsdeildinni og svo seinni leikinn á móti Hadjuk Spilt í umspili um sæti í riðlakeppni Evrópudeildarinnar. Everton vann 2-0 sigur á heimavelli í fyrri leiknum en ferðast nú til Króatíu fyrir seinni leikinn á fimmtudaginn.

Hollenski knattspyrnustjórinn lofar því að hann ætli að nota Gylfa í öllum þremur leikjunum.

„Ég hef ekki áhyggjur af forminu hans,“ sagði Ronald Koeman í viðtali á heimasíðu ensku úrvalsdeildarinnar en Gylfi spilaði ekki nema einn leik með Swansea á undirbúningstímabilinu.

„Hann er auðvitað leikmaður sem þarf að spila leiki og þarf leiki á undirbúningstímabilinu til að vera í hundrað prósent leikformi. Formið hans er hinsvegar gott og hann er fagmaður,“ sagði Koeman en hvað með leikinn annað kvöld á móti Manchester City á Ethiad?

„Hann mun fá spilatíma. Það er erfið vika framundan hjá okkur og Gylfi mun taka þátt í öllum þremur leikjunum,“ sagði Ronald Koeman.