Barry: Hélt að jóga væri fyrir eldri konur

Gareth Barry slær væntanlega leikjametið í ensku úrvalsdeildinni þegar West Brom sækir Arsenal heim á mánudaginn.

Barry lék sinn 632. leik í ensku úrvalsdeildinni um síðustu helgi og jafnaði þar með leikjamet Ryans Giggs.

Hinn 36 ára gamli Barry byrjaði að stunda jóga fyrir átta árum og segir að það hafi hjálpað mikið til. Hann viðurkennir þó að hafa haft fordóma fyrir jóga í byrjun.

„Ég var af gamla skólanum og hélt að jóga væri fyrir eldri konur,“ sagði Barry sem lætur stríðni liðsfélaganna ekki á sig fá.

Barry gekk í raðir West Brom frá Everton í sumar. Hann lék áður með Aston Villa og Manchester City sem hann varð Englandsmeistari með árið 2012.