Mourinho: Neymar breytti öllu

José Mourinho, stjóri Manchester United, segir að kaup PSG á Neymar í sumar hafi breytt leikmannamarkaðnum endanlega.

Eins og vitað er þá keypti franska liðið Neymar á 198 milljónir punda frá Barcelona og er það metupphæð en Mourinho telur að forráðarmenn Manchester United hafi verið klókir að klára öll sín kaup snemma í sumar.

„Við vorum mjög sniðugir. Við héldum að það gæti eitthvað gerst sem myndi breyta markaðnum endanlega og það gerðist.“

„Vanalega verða leikmenn ódýrari eftir því sem líður á sumarið en það var ekki raunin í sumar vegna þess hvað gerðist með PSG og Neymar.“

Manchester United keypti þá Romelu Lukaku frá Everton á 90 milljónir punda og Nemanja Matic frá Chelsea á 40 milljónir punda en Mourinho telur að þeir hefðu verið mun dýrari eftir kaup PSG á Neymar.

„Ég tel að hefðum við keypt Lukaku þann 31.ágúst þá hefði hann kostað 150 milljónir punda og Matic hefði kostað 60 eða 70 milljónir punda, Neymar breyttu öllu.“