Glugganum verður lokað fyrr næsta sumar

Félagsskiptaglugga ensku úrvalsdeildarinnar verður lokað áður en tímabilið hefst næsta sumar. Félögin í deildinni kusu um málið á fundi í dag og staðfestu tillöguna.

Glugganum mun verða lokað klukkan 17:00 að staðartíma í Bretlandi fimmtudeginum áður en fyrsta umferð ensku úrvalsdeildarinnar verður spiluð sumarið 2018.

Samþykkt tillögunnar var ekki einróma og hefur ekki áhrif á félagsskiptaglugga í neðri deildum Englands. Lið í Englandi munu því ekki geta keypt sér nýja leikmenn bróðurpartinn úr ágústmánuði, en lið annars staðar í Evrópu munu geta náð sér í leikmenn út ágúst eins og vant hefur.