Getur Gylfi komið Everton upp í næstu tröppu?

Framhaldssögunni um félagaskipti Gylfa Þórs Sigurðssonar lauk loks 16. ágúst þegar hann var kynntur sem nýr leikmaður Everton. Talið er að Everton hafi borgað Swansea City um 45 milljónir punda fyrir Gylfa sem gerir hann að dýrasta leikmanni í sögu bláa liðsins í Liverpool. Þá er hann langdýrasti íslenski fótboltamaðurinn frá upphafi.

Gylfi brosti breitt eftir að hafa skrifað undir fimm ára samning við Everton. Ronald Koeman, knattspyrnustjóri liðsins, var einnig alsæll með að hafa landað íslenska landsliðsmanninum sem hann hefur lengi haft augastað á.

„Allt frá upphafi var hann einn af þeim leikmönnum sem ég vildi fá til Everton. Fyrst og fremst út af því hversu góður hann er og vegna reynslu hans úr ensku úrvaldsdeildinni sem hann býr yfir. Að mínu mati er hann einn af bestu leikmönnum ensku úrvalsdeildarinnar í sinni stöðu,“ sagði Koeman um Gylfa.

Íslenski landsliðsmaðurinn kom inn á sem varamaður í 1-1 jafntefli gegn Manchester City í 2. umferð ensku úrvalsdeildarinnar mánudaginn 21. ágúst. Þremur dögum síðar var hann í byrjunarliðinu í seinni leiknum gegn Hajduk Split í umspili um sæti í riðlakeppni Evrópudeildarinnar. Í upphafi seinni hálfleiks skoraði hann sitt fyrsta mark fyrir Everton sem stuðningsmenn liðsins eru eflaust búnir að horfa 100 sinnum á. Gylfi skoraði þá með óvæntu skoti yfir markvörð Hajduk, nánast frá miðju. Stórkostlegt mark sem létti eflaust smá pressu af Gylfa sem er sem áður sagði dýrasti leikmaður í sögu Everton.

Koeman á sér stóra drauma og vill koma Everton í fremstu röð. Þessi hugsunarháttur Hollendingsins virðist hafa höfðað til Gylfa ef marka má orð hans eftir að félagaskiptin frá Swansea gengu í gegn.

„Hann [Koeman] var frábær leikmaður og einn sá besti á sínum tíma. Nú er hann góður stjóri og framtíðarsýn hans hjá Everton er skýr. Það skipti miklu máli fyrir mig að hann væri stjórinn. Það er bæði draumur minn og allra hjá félaginu að vinna titla með Everton,“ sagði Gylfi.

Það verður þó enginn hægðarleikur fyrir Everton að komast í hóp þeirra bestu. Koeman hefur verið duglegur á félagaskiptamarkaðinum í sumar og fékk meðal annars Wayne Rooney aftur heim á Goodison Park. En það er vandséð að Koeman hafi fyllt skarðið sem Romelu Lukaku skildi eftir sig. Belginn öflugi skoraði 25 mörk í fyrra og Everton þarf að finna þessi mörk einhvers staðar.

Rooney og Gylfi munu skora sín mörk en þeir þyrftu helst að njóta aðstoðar alvöru framherja. Miðað við frammistöðuna í 2-0 tapinu fyrir Chelsea um síðustu helgi er Sandro Ramírez ekki í þeim flokki. Í þeim leik vantaði Everton sárlega einhvern til að hlaupa aftur fyrir vörn Chelsea. Hinn ungi og efnilegi Dominic Calvert-Lewin er mjög fljótur og býður upp á þann möguleika. En hann hefur bara skorað tvö mörk fyrir Everton síðan hann kom til liðsins og býr yfir lítilli reynslu.

Hvað svo sem gerist hjá Everton í vetur, þá verður alltaf gaman að fylgjast með Gylfa. Hann er í stóru hlutverki í stóru liði og þar á bæ búast menn við miklu af honum. Annars hefðu þeir ekki borgað 45 milljónir punda fyrir íslenska landsliðsmanninn sem átti stærstan þátt í því að Swansea hélt sér í ensku úrvalsdeildinni á síðasta tímabili. En nú stendur Gylfi frammi fyrir nýrri áskorun sem hann mun eflaust stand­ast með stæl.

Þessi grein birtist fyrst í sérblaði um enska boltann 2. september síðastliðinn.