"Wenger ætti að hjálpa til við velja eftirmann sinn“

Rússneski milljarðamæringurinn Alisher Usmanov, næststærsti hluthafinn í Arsenal, segir að Arsene Wenger, knattspyrnustjóri liðsins, eigi að koma að því að velja eftirmann sinn.

Samningur Wengers rennur út í sumar en ekki liggur ljóst fyrir hvort Frakkinn verði áfram við stjórnvölinn hjá Arsenal. Wenger hefur stýrt Lundúnaliðinu frá árinu 1996 en enginn af stjórunum í ensku úrvalsdeildinni hefur stýrt liði jafn lengi og Wenger.

Frakkinn hefur verið undir mikilli pressu á undanförnum vikum en stuðningsmenn Arsenal hafa verið duglegir að mótmæla, m.a. undir slagorðinu Wenger Out. Usmanov hefur hins vegar enn mikla trú á Wenger, þrátt fyrir slakt gengi Arsenal að undanförnu.

„Það er ekki bara hægt að kenna þjálfaranum um það sem er að gerast,“ sagði Usmanov í samtali við Bloomberg. Hann segir að Wenger eigi að hafa eitthvað að segja um hver tekur við af honum.

„Það þarf að undirbúa arftakann og ég legg til að Wenger komi að því að velja hann. Sjálfur kem ég ekkert nálægt ákvörðunum hjá félaginu. Öll ábyrgðin á framtíð félagsins er hjá aðalhluthafanum [Stan Kroenke],“ bætti Usmanov við.

Arsenal, sem situr í 6. sæti ensku úrvalsdeildarinnar, sækir Crystal Palace heim í kvöld. Leikurinn hefst klukkan 19:00 og verður sýndur í beinni útsendingu á Stöð 2 Sport HD.