Breiðablik hefur á síðasta sólarhringnum fengið til sín þá Hrvoje Tokic frá Víkingi Ólafsvík og Aron Bjarnason frá ÍBV en Kópavogsliðið safnar nú öflugum sóknarmönnum.

Áður höfðu Blikar fengið til sín Martin Lund Pedersen frá Fjölni. Allir eiga þessir þrír leikmenn það sameiginlegt að hafa verið markahæstu leikmenn síns félags í Pepsi-deildinni á síðasta tímabili.

Það efast enginn um það að Blikunum vantaði hjálp við markaskorun. Árni Vilhjálmsson, sem lék bara hálft tímabilið, var markahæstur hjá Blikum síðasta sumar með 6 mörk og kom alls með beinum hætti að 10 af 27 mörkum Kópavogsliðsins þrátt fyrir að spila aðeins 55 prósent leikjanna (12 af 22).

Árni Vilhjálmsson er nú aftur farinn út og því hafa Blikar farið grimmt inn á leikmannamarkaðinn í leit að markaskorurum fyrir átökin í Pepsi-deildinni 2017.

Martin Lund Pedersen var markahæstur hjá Fjölni með 9 mörk en hann átti einnig 5 stoðsendingar og fiskaði tvö víti sem gáfu mörk. Martin Lund kom því með beinum hætti að sextán mörkum Fjölnis í Pepsi-deildinni 2016.

Hrvoje Tokic var markahæstur hjá Víkingi Ólafsvík með 9 mörk en hann átti einnig 2 stoðsendingar og fiskaði eitt víti sem gaf mörk. Tokic kom því með beinum hætti að tólf mörkum Víkinga í Pepsi-deildinni 2016.

Aron Bjarnason var markahæstur hjá ÍBV með 5 mörk en hann átti einnig 2 stoðsendingar og kom því með beinum hætti að sjö mörkum ÍBV í Pepsi-deildinni 2016.

Umræddir þrír nýir leikmenn Blika skoruðu því 23 mörk saman eða aðeins fjórum mörkum minna en allt Blikaliðið til samans. Þeir voru síðan einnig með 9 stoðsendingar og 3 fiskuð víti sem gáfu mörk.

Blikar skoruðu „aðeins“ 27 mörk í Pepsi-deildinni eða minnst af þeim liðum sem enduðu í átta efstu sætunum.

Breiðabliks endaði í sjötta sæti en Valsmenn sem voru ofar á markatölu skoruðu fjórtán mörkum meira en Blikaliðið síðasta sumar.

Það skilaði því ekki Blikum Evrópusæti þótt að aðeins Íslandsmeistarar FH hafi fengið á sig færri mörk.

Það fylgir þó sögunni að engum þessara þriggja leikmanna, Martin Lund Pedersen, Hrvoje Tokic eða Aroni Bjarnasyni tókst að skora hjá Blikum síðasta sumar. Saman spiluðu þeir í 423 mínútur á móti Blikavörninni og uppskera þeirra var 0 mörk og 1 stoðsending (Tokic).