Wenger: „Ég hef ekki séð Özil í viku“

Mesut Özil, miðjumaður Arsenal í ensku úrvalsdeildinni, er frá vegna veikinda og er ekki búist við því að hann spili aftur fyrr en um miðjan janúar. Hann er búinn að missa af síðustu tveimur leikjum liðsins.

Arsene Wenger, knattspyrnustjóri Arsenal, staðfesti þetta í viðtali fyrir ótrúlegt 3-3 jafntefli gegn Bournemouth í ensku úrvalsdeildinni í gærkvöldi. Mörkin úr þeim svakalega leik má sjá í spilaranum hér að ofan.

Özil, sem er búinn að skora fimm mörk og gefa fjórar stoðsendingar í ensku deildinni í vetur, missti af 2-0 sigri Arsenal gegn Crystal Palace og jafnteflinu gegn Bournemouth í gærkvöldi.

Hann var gagnrýndur fyrir frammistöðu sína í tveimur tapleikjum gegn Everton og Manchester City áður en hann lagði svo upp sigurmark Arsenal gegn West Brom á öðrum degi jóla. Síðan þá hefur hann hvorki spilað né æft.

„Ég hef ekki séð Özil í viku,“ sagði Wenger í viðtali við Sky Sports fyrir leikinn í gær. „Það var auðveld ákvörðun að taka hann ekki með hingað því hann er enn þá rúmliggjandi.“

„Hann var ekki klár í leikinn og ég býst ekki við að hann verði með í næsta leik. Hann hefur ekkert æft í eina viku.“

Özil verður að öllum líkindum ekki með Arsenal þegar liðið mætir Preston í enska bikarnum um helgina en gæti snúið aftur í leikmannahópinn þegar Skytturnar mæta Gylfa Þór Sigurðssyni og félögum á útivelli 14. janúar í ensku úrvalsdeildinni.