Hylja auga til að sýna sýrlensku ungbarni samstöðu

Kjartan Kjartansson skrifar 25. desember 2017 11:21

Karim missti annað augað þegar hann lenti í stórskotaliðsárás í úthverfi Damaskusar 29. október. Rauði hálfmáninn í Tyrklandi

Fjöldi fólks, allt frá íþróttamönnum til stjórnmálamanna, hefur birt myndir af sér þar sem það hylur annað augað á samfélagsmiðlum undanfarið. Með því vill fólkið sýna ungum sýrlenskum dreng sem missti augað í stórskotaliðsárás samstöðu.

Karim Abdel Rahman missti augað í árás á Austur-Ghouta, úthverfi Damaskusar, fyrir tveimur mánuðum. Hann er nú orðinn að tákni um blóðbaðið og mannúðarástandið sem hefur geisað í landinu í að verða sjö ár, að því er kemur fram í frétt CNN.

Turkish aid agency reaches Syrian baby Karim | @yenisafakEN https://t.co/EBbBsJoeHw pic.twitter.com/CsdEdj6k47
— Turkish Red Crescent (@RedCrescentTR) December 23, 2017

Undanfarið hefur fólk sýnt samstöðu sína á samfélagsmiðlum undir myllumerkjum eins og #SamstaðaMeðKarim [e. #SolidarityWithKarim] og #StöndumMeðKarim [e. #StandWithKarim].

„Hann og móðir hans lentu í stórskotaliðsárás á vinsælum markaði í Hammuriah í Austur-Ghouta. Móðir Karims féll í árásinni og Karim fékk verulega áverka á höfuðkúpu,“ segir Samband heilbrigðisþjónustu og hjálparsamtaka sem hjálpa stríðshrjáðum Sýrlendingum.

Á meðal þeirra sem hafa sýnt Karim stuðning með þessum hætti eru franski knattspyrnumaðurinn Franck Ribery, Saad Hariri, forsætisráðherra Líbanons og Matthew Rycroft, sendifulltrúi Breta við Sameinuðu þjóðirnar.