Rangers sagði upp samningi Joey Barton

Vandræðagemlingurinn Joey Barton hefur spilað sinn síðasta leik fyrir skoska félagið Rangers en félagið ákvað í dag að segja upp samningi sínum við leikmanninn.

Rangers tilkynnti um samningsrofið á Twitter-síðu sinni í dag og þar kom einnig fram að hvorki Rangers né Joey Barton muni tjá sig frekar um þetta mál. Barton var bara í 133 daga hjá Rangers en fær nú væntanlega ágætis starfslokasamning.

Það hefur gengið á ýmsu hjá Joey Barton í haust. Fyrst lenti hann í rifildi við liðsfélaga á æfingu sem kostaði hann agabann og svo var hann settur í annað lengra bann af skoska knattspyrnusambandinu fyrir að veðja á fótboltaleiki í Skotlandi.

Barton fékk í september sex vikna agabann hjá Rangers fyrir rifildi við liðsfélaga sinn Andy Halliday á æfingasvæði Rangers.

Áður en að Barton snéri til baka úr agabanninu var miðjumaðurinn ákærður fyrir að brjóta reglur um veðja á fótboltaleiki í Skotlandi en knattspyrnumenn í landinu mega það ekki.

Skoska knattspyrnusambandið sakaði Barton um að hafa ólöglega veðjað á 44 leiki frá 1. júlí til 15. september 2016.

Joey Barton er 34 ára gamall og á sínu fyrsta tímabili með Rangers. Hann náði að spila átta leiki með liðinu áður en allt fór í brjál og brand.

Baron hjálpaði Burnley að vinna sér sæti í ensku úrvalsdeildinni á síðustu leiktíð og var meðal annars valinn í lið ársins. Hann gerði hinsvegar bara eins árs samning og hætti eftir tímabilið.

Barton gerði í staðinn tveggja ára samning við Rangers en sá samningur heyrir nú sögunni til eftir aðeins þrjá mánuði.

Rangers and Joey Barton have agreed to terminate his contract with immediate effect. Neither Rangers nor Joey Barton will comment further.

— Rangers FC (@RangersFC) November 10, 2016