Birkir fer ekki í ensku B-deildina

Jim Solbakken, umboðsmaður Birkis Bjarnasonar, segir engar líkur á því að íslenski landsliðsmaðurinn muni yfirgefa Basel í Sviss til að spila í ensku B-deildinni. Birkir spilar með svissnesku meisturunum í Basel.

Þrír íslenskir leikmenn landsliðsins hafa fært sig um set eftir EM í sumar og gengið til liðs við félög í B-deildinni á Englandi. Þeir eru Ragnar Sigurðsson (Fulham), Hörður Björgvin Magnússon (Bristol City) og Jón Daði Böðvarsson (Wolves).

Sjá einnig: Smá högg að Liverpool valdi að taka nafna minn

Vísir bar orðróm þess efnis að félög í ensku B-deildinni væru með Birki í sigtinu undir Solbakken sem sagði engar líkur á því að Birkir myndi taka tilboði frá liði í þeirri deild.

„Birkir átti frábært tímabil með Basel og er að fara að spila í Meistaradeildinni í vetur. Því myndi hann aldrei fórna fyrir ensku B-deildina,“ sagði Solbakken.

„Það er mikill áhugi á Birki og það er draumur margra knattspyrnumanna að spila í Englandi. En fyrir Birki kæmi aðeins til greina að fara til sterks úrvalsdeildarliðs.“

Sjá einnig: Það vantaði trommuna í víkingaklappinu

Birkir er 28 ára og spilaði lengi á Ítalíu við góðan orðstír áður en hann hélt til Sviss fyrir ári síðan. Hann vann sinn fyrsta meistaratitil á ferlinum með félaginu í vor. Liðið á öruggt sæti í Meistaradeild Evrópu í vetur en dregið verður í riðla í keppninni klukkan 16.00 í dag. Sýnt verður frá drættinum í beinni útsendingu á Stöð 2 Sport.