Cahill: Viljum bæta félagsmetið

Gary Cahill vill sjá Chelsea bæta félagsmetið yfir flesta sigra í röð þegar liðið tekur á móti Bournemouth á öðrum degi jóla.

Chelsea hefur unnið 11 leiki í röð í ensku úrvalsdeildinni og er með sex stiga forskot á toppnum. Með sigri á Bournemouth á mánudaginn bætir Chelsea félagsmetið yfir flesta sigurleiki í röð í efstu deild.

„Þetta er ekki eitthvað sem við ræðum daglega um. Raunar hef ég ekki heyrt neinn tala um þetta. En við erum meðvitaðir um þetta. Að sjálfsögðu vill maður vera hluti af liði sem slær met,“ sagði Cahill í samtali við Sky Sports.

„Við erum meðvitaðir um þetta og möguleikinn á að bæta metið ætti að hvetja okkur til enn frekari dáða. Við viljum fá þrjú stig og bæta metið,“ bætti enski landsliðsmaðurinn við.

Cahill segir að lífið núna sé talsvert auðveldara en á sama tíma í fyrra þegar Chelsea var í fallbaráttu.

„Það eru allir ánægðir og það segja allir að það sé auðveldara að spila í sigurliði. Við erum á frábæru skriði og vonumst til að það haldi áfram. Við erum fullir sjálfstrausts,“ sagði Cahill.