Bundy hvetur félaga sína til að leggja niður vopn

Ammon Bundy, leiðtogi vopnaðs hóps manna sem hefur haft skrifstofur náttúruverndarstofnunar í Oregon í Bandaríkjunum á sínu valdi um nokkurra vikna skeið, hefur hvatt félaga sína til að leggja niður vopn og fara heim.

Bundy er meðal þeirra átta sem handteknir voru í áhlaupi bandarísku alríkislögreglunnar aðfaranótt miðvikudags. Þrír aðrir hafa verið handteknir síðan.

Mál Bundy og félaga hefur vakið mikla athygli en þeir hafa setið um skrifstofurnar frá því 2. janúar síðastliðinn til að mótmæla eign alríkisins á beitarlandi í Oregon, sem þeir telja eign íbúa ríkisins.

Að því er breska ríkisútvarpið greinir frá, liggur ekki fyrir hversu margir taka enn þátt í umsátrinu. Í tilkynningu frá lögmanni sínum hvetur Bundy þá til að hætta því.

„Til þeirra sem enn halda til í skrifstofunum, ég elska ykkur,“ er haft eftir Bundy. „Leyfið okkur að sjá um slaginn úr þessu. Gerið það, leggið niður vopn. Farið heim og knúsið fjölskyldur ykkar. Núna tökum við slaginn fyrir dómstólum.“

Hann vottaði einnig Robert „LaVoy“ Finicum, talsmanni hópsins sem lést í áhlaupi alríkislögreglunnar, virðingu sína.

Bæði lögregla á staðnum og alríkislögregla segjast leitast eftir því að leysa úr vandanum á friðsælan hátt.