Touré sviptur ökuréttindum vegna ölvunaraksturs en segist ekki hafa drukkið viljandi

Yaya Touré, leikmaður Manchester City, má ekki keyra næstu 18 mánuðina eftir að hann var tekinn ölvaður undir stýri á dögunum.

Touré sendi frá sér yfirlýsingu í dag þar sem fram kemur að hann hafi gengist við broti sínu. Hann var sviptur ökuréttindum í 18 mánuði og fékk 54.000 punda sekt.

Touré þvertekur þó fyrir að hafa drukkið áfengi viljandi. Hann er bindindismaður vegna trúar sinnar og hefur alltaf afþakkað kampavínsflöskur sem menn leiksins í ensku úrvalsdeildinni fá í verðlaun.

Í yfirlýsingunni kemur þó ekki fram hvernig áfengið komst inn um varir miðjumannsins öfluga sem virðist aðeins vera að hagræða sannleikanum í þessu tilfelli.

Touré er nýbyrjaður að spila aftur með Man City eftir að hafa verið í skammarkróknum hjá Pep Guardiola, knattspyrnustjóra liðsins. Hann kom inn á sem varamaður þegar Man City tapaði 4-2 fyrir Leicester City á laugardaginn.