Tíu ár frá flótta Natöschu Kampusch: Dvelur enn í húsinu þar sem henni var haldið fanginni

Tíu ár eru í dag liðin frá flótta austurrísku stúlkunnar Natöschu Kampusch sem hafði verið haldið fanginni af Wolfgang Priklopil í átta og hálft ár.

Málið vakti gríðarlega athygli á sínum tíma og hefur Kampusch nú rætt við fjölmiðla um hvernig henni tókst að flýja frá fangara sínum, bankaði á glugga nágranna og bað um hjálp, lágri röddu. Priklopil fannst látinn síðar sama dag og Kampusch hafði flúið frá heimili hans.

Var rænt á leið til skóla

Hin 28 ára Kampusch dvelur nú um helgar í húsi Priklopil í bænum Strasshof an der Nordbahn, um hálftíma frá Vínarborg, þar sem henni var haldið fanginni í földu kjallararými. Priklopil hélt henni sem þræl, beitti hana kynferðisobeldi og bjó hún við mikla vannæringu.

Henni var rænt tíu ára gamalli þann 2. mars 1998 þegar hún var á leið til skóla í Donaustadt, úthverfi Vínar.

Tólf ára gamall sjónarvottur sagði við lögreglu að hann hafi séð tvo menn ýta stúlku inn í sendiferðabíl, en Kampusch sagði síðar að einungis einn maður hafi verið að verki.

Var að þrífa bíl fangarans og flúði

Kampusch tókst svo að flýja þann 23. ágúst 2006, en í samtali við þýska blaðið Bild rifjar hún upp flóttann. „Mér var sagt að þrífa bílinn hans. Hann vildi selja bílinn og sagði mér að þrífa hann hátt og lágt. Ég man að mér leið eins og ég geti borðað hest þar sem ég þurfti að búa til samlokur með sultu fyrir hann í morgunmat en fékk ekkert sjálf.“

Skömmu fyrir klukkan eitt þennan dag var hringt í síma hins 44 ára gamla Priklopil og var hann annars hugar. „Áður hafði hann fylgst með mér allan tímann. En þar sem ég var með ryksuguna í gangi varð hann að bregða sér aðeins frá til að heyra betur í þeim sem hringdi í hann.“

Bankaði upp á

Hún hafi þá nýtt tækifærið og farið út um hliðið á lóðinni, sem vanalega hafi verið læst, en ekki á þessum degi. Segist hún varla hafa getað andað á þeirri stund og átt erfitt með að hreyfa sig. „Ég leit til hægri og vinstri en vissi ekkert hvert ég ætti að fara. Svo hljóp ég.“

Kampusch hljóp framhjá tveimur íbúðarhúsum en lét vera að banka þar upp á. „Ég var hrædd um að hann myndi elta mig svo ég vildi komast lengra í burtu og fela mig.“

Hún hafi svo hitt tvo menn sem voru á gangi með ungum strák. „Ég bað þá um að hringja í lögregluna úr farsíma sínum en þeir hunsuðu mig og héldu bara áfram. Svo sá ég konu sem stóð í garðhúsi og bankaði á glugganum og hvíslaði „Gerðu það, hjálpaðu mér.“ Hún spurði hvað ég væri að gera í garðinum hennar og hringdi svo í lögregluna.“

Kampusch hefur ekkert hitt konuna frá þessum degi.

Rannsaka dauða Priklopil

Kampusch hefur nú gefið út nýja bók sem nefnist Tíu ár af frelsi. Hún þarf enn að kljást við afleiðingar vistarinnar.

Í frétt Daily Mail segir að rannsókn standi nú yfir á meintu sjálfsvígi Priklopil, en réttarlæknar segja að möguleiki sé á að hann hafi verið myrtur. Möguleiki sé á að hann hafi verið myrtur áður en hann varð fyrir lestinni.

Mikið hefur einnig verið fjallað um þátt Ernst Holzapfel, besta vinar og viðskiptafélaga Priklopil, í málinu.

Nokkrum klukkustundum eftir flótta Kampusch og dauða Priklopil hélt Holzapfel óáreittur inn í hús Priklopil, þar sem hann sagðist vera að sækja verkfæri í sinni eigu.

Grunur leikur hins vegar á að hann hafi fjarlægt tölvur og önnur raftæki sem innihéldu gögn sem myndu tengja hann við málið.

Hann hefur ætíð hafnað því að hafa átt þátt í að hafa haldið Kampusch fanginni, en vitað er til þess að hann og Kampusch hafi rætt saman í síma í á annað hundrað skipti eftir að hún slapp.

Hætti á samfélagsmiðlum

Kampusch dvelur nú um helgar í húsi Priklopil. Þrátt fyrir að hafa auðgast mikið á sjónvarpsviðtölum, bókasamningum og að hafa selt kvikmyndaréttinn að bók sinni virðist hún eiga í miklum vandræðum með að hefja nýtt líf.

Fjölmiðlar greindu frá því á sínum tíma að hún hafi einangrað sig fyrir tveimur árum, hætt á samfélagsmiðlum og hætt í ökukennslu þar sem henni hafi þótt óþægilegt að vera í bíl sem „gæti farið með hana eitthvert burt“.

Þá hafi hún á sínum tíma hætt í skóla þar sem henni hafi þótt erfitt að vera í margmenni.