Pressan náði til sumra leikmanna Tottenham og þeir frusu

Tottenham er líklega úr leik í baráttu um enska meistaratitilinn eftir 1-1 jafntefli gegn West Bromwich Albion á útivelli í gærkvöldi. Leicester þarf nú aðeins einn sigur í síðustu þremur leikjum sínum til að verða meistari.

Tottenham komst yfir í fyrri hálfleik með sjálfsmarki Craig Dawson en Dawson bætti upp fyrir mistök sín í seinni hálfleik og jafnaði metin. Spurs var betri aðilinn og hefði getað skorað fleiri mörk en allt kom fyrir ekki.

Graeme Souness, sparkspekingur Sky Sports, var gestur Monday Night Football í gærkvöldi og sagði að pressan hefði einfaldlega náð til þessa unga Tottenham-liðs.

„Þetta Tottenham-lið er það yngsta í úrvalsdeildinni og enginn í liðinu hefur verið nálægt því að vinna titilinn áður,“ sagði Souness.

„Það leit því svo sannarlega út eins og pressan hafi náð til sumra í seinni hálfleiknum. Þetta urðu stressandi aðstæður og þeim fannst þeir þurfa annað mark.“

Souness segir að Tottenham hefði átt að vera meira yfir en 1-0 í hálfleik en í seinni hálfleiknum hafi liðið ekki verið svipur hjá sjón.

„Aldrei í seinni hálfleik hefði maður sem stuðningsmaður Tottenham sagt að liðið væri líklegt til að skora eða það væri að stýra leiknum. Sumir leikmenn Tottenham einfaldlega frusu,“ sagði Graeme Souness.